وزیر اعلیٰ پنجاب دا ضلعیاں نوں خودمختار بناؤن دا فیصلہ، ترقیاتی منصوبے شروع
وزیراعلیٰ دی صدارت وِچ کمشنراں دے اہم اجلاس وِچ پنجاب بھر دے ڈسٹرکٹ ڈویلپمنٹ پلانز دا جائزہ لیا گیا، جدکہ ساہیوال، سرگودھا، فیصل آباد تے ملتان ڈویژناں دے کمشنراں نے موجودہ وسائل تے تجویز کیتے گئے منصوبیاں بارے تفصیلی بریفنگ دِتی۔
مریم نواز شریف نے اجلاس وِچ صاف کر دِتا کہ “آئی واش نہیں، گراؤنڈ ورک چاہیدا اے”، کمشنر ہݨ صرف ایئرکنڈیشنڈ دفتراں وِچ نہیں بلکہ فیلڈ وِچ نظر آؤنے چاہیدے نیں، جے اختیار انتظامیہ کول اے تے ذمہ داری وی اوہدی ہووے گی، عوام نوں سچی مچی ریلیف مِلنا چاہیدا اے۔
فیصل آباد ڈویژن وِچ پرائیویٹ ہاؤسنگ سوسائٹی دے کھلے کھڈے وِچ تِن سالاں دی بچی دے جان توں جاݨ دے واقعے تے وزیراعلیٰ سخت غصے وِچ نظر آئیاں۔ اوہناں حکم دِتا کہ جے کوئی شہری مین ہول وِچ ڈِگیا تے متعلقہ سوسائٹی مالکان نوں گرفتار کیتا جاوے گا۔ ساریاں پرائیویٹ ہاؤسنگ سوسائٹیاں توں ہر مہینے کھلے مین ہولز نہ ہوݨ دا بیانِ حلفی لیݨ تے پنجاب بھر دیاں ساریاں پرائیویٹ سوسائٹیاں نوں نوٹس جاری کرن دا وی حکم دِتا گیا۔
وزیراعلیٰ نے سرکاری تے پرائیویٹ سکولاں دیاں عمارتاں تے خاص نظر رکھݨ، ساریاں کنسٹرکشن سائیٹس نوں SOPs دے مطابق گھیرن (cardon off) تے ساریاں تحصیلاں وِچ ڈیپ کلیننگ نوں یقینی بناؤن دی ہدایت کیتی۔ اوہناں آکھیا کہ کجھ افسر چنگا کم کر رہے نیں پر کجھ نے صرف “آئی واش” بنایا ہویا اے، زمین تے انا کم نظر نہیں آ رہیا جنا آؤنا چاہیدا سی۔
ساہیوال ڈویژن لئی لوکل گورنمنٹ دے 4 ارب روپے دے فنڈز موجود ہوݨ دی بریفنگ دِتی گئی، جدکہ ساہیوال شہر تے آلے دوالے وِچ 1.12 ارب روپے دے ترقیاتی منصوبے شروع کیتے جاݨ گے۔ 862 ملین روپے دی لاگت نال 18.8 کلومیٹر لمیاں 10 اہم سڑکاں تعمیر ہووݨ گیاں، جدکہ ستمبر 2026 تک ساہیوال دیاں سڑکاں دی تعمیر تے مرمت مکمل کرن دا ہدف رکھیا گیا اے۔
