جیرے لوکاں کول زمین نہیں اوہناں نوں مفت دیاں گے: مریم نواز
وزیراعلیٰ پنجاب مریم نواز نے آکھیا اے جے “جیہناں لوکاں کول زمین نہیں، اوہناں نوں مفت مہیا کراں گے”۔ صوبائی دارالحکومت (لاہور) وچ مزدوراں نوں فلیٹ ونڈن دی تقریب نال خطاب کردے ہوئے مریم نواز دا کہنا سی جے میں مزدوراں نوں گھر ملن اُتے مبارکباد دیندی آں۔
اوہناں نے آکھیا جے اپنا گھر بہت وڈی نعمت ہوندا اے، مہنگائی تے مشکلاں دے ایس دور وچ مکان بنانا بڑا اوکھا کم اے، غریب مزدوراں نوں گھر ملن اُتے مینوں بڑی خوشی ہوئی اے۔
وزیراعلیٰ پنجاب نے دسیا جے ہر رہائشی فلیٹ دی تعمیر اُتے 35 لکھ روپے لاگت آئی اے، پر حقدار مزدوراں نوں اے فلیٹ بالکل مفت دتے جا رہے نیں۔
مریم نواز دا کہنا سی جے پہلے مرحلے وچ 720 فلیٹ دتے جا رہے نیں، ٹیکسلا وچ 500 گھر تیار ہون والے نیں، جدکہ “اپنی چھت اپنا گھر” پروگرام دے تحت اک لکھ گھر مکمل ہو چکے نیں۔
اوہناں نے ہور آکھیا جے جیہناں لوکاں کول زمین نہیں، اوہناں نوں مفت دیاں گے، پندرہ لکھ محنت کشاں نوں راشن کارڈ جاری کیتے نیں۔ غریب تے درمیانے طبقے نوں اپنی چھت دینا ساڈی پہلی ترجیح اے۔ “ستھرا پنجاب” منصوبے نوں پوری دنیا وچ اک ماڈل دے طور اُتے پیش کیتا جا رہا اے تے ایہدا دائرہ پورے صوبے تیکر پھیلا دتا گیا اے۔ اوہناں نے ایہہ وی دسیا جے اوہ ایس ہفتے آذربائیجان دا دورہ کرن گیاں۔
