“سٹار فٹبالر لیونل میسی اک وار پھر امریکی لیگ دے سب توں مہنگے کھلاڑی بن گئے”
ارجنٹائن دے جگ مشہور فٹبالر لیونل میسی نے اک واری فیر امریکی فٹبال لیگ (ایم ایل ایس) وچ سب توں ودھ معاوضہ لین والے کھلاڑی دا اعزاز اپنے ناں برقرار رکھیا اے، جدکہ اوہناں دی سالانہ تنخواہ وچ وی وڈا وادھا کر دتا گیا اے۔ غیر ملکی میڈیا رپورٹاں دے مطابق، انٹر میامی دے سٹار کھلاڑی لیونل میسی دی بنیادی سالانہ تنخواہ ودھا کے 25 ملین ڈالر کر دتی گئی اے، جدکہ بونس تے ہور سہولتاں ملا کے اوہناں دی کل آمدن 28.3 ملین ڈالر سالانہ تیکر اپڑ گئی اے۔
رپورٹاں دے مطابق میسی دی نویں تنخواہ لیگ دے دوجے نمبر دے مہنگے کھلاڑی توں دگنی توں وی ودھ اے۔ ایس لسٹ وچ دوجے نمبر اُتے سون ہیونگ من نیں، جیہناں نوں سالانہ تقریباً 11.2 ملین ڈالر مل رہے نیں۔
ایم ایل ایس پلیئرز ایسوسی ایشن دے جاری کیتے گئے انگاں متھاں (اعداد و شمار) مطابق، میسی نے پچھلے سال انٹر میامی نال اپنے معاہدے وچ وادھا کیتا سی، جیہدے توں بعد اوہ ہن 2028 دے سیزن تیکر کلب دا حصہ رہن گے۔
38 سالہ میسی 2023 وچ انٹر میامی وچ شامل ہوئے سن تے اودوں توں لیگ دی مقبولیت تے پیسے وچ بڑا وادھا ویکھن وچ آیا اے۔ اوہناں نے ہن تک ایم ایل ایس وچ 64 میچ کھیل کے 59 گول کیتے نیں، جدکہ پچھلے سیزن وچ 29 گولاں دے نال اوہ لیگ دے بہترین کھلاڑی وی قرار پائے سن۔
