“لبنان اُتے اسرائیل دے بم حملے، 2 بچیاں سمیت 8 بندے مارے گئے”
لبنان وچ جنگ بندی دے باوجود اسرائیلی حملیاں وچ تیزی برقرار اے تے اج بیروت دے دکھن (جنوب) ول ساحلی سڑک اُتے اک گڈی نوں نشانہ بنایا گیا۔ عالمی خبر رساں ادارے دے مطابق، لبنان دی وزارتِ صحت نے دسیا اے جے دارالحکومت بیروت توں کوئی 20 کلومیٹر دور ساحلی شاہراہ اُتے گڈیاں نوں نشانہ بنا کے تن وکھو وکھ فضائی حملے کیتے گئے۔
اسرائیلی حملے دے بعد اک گڈی پوری طرح سڑ کے سواہ ہوگئی تے اوہدے وچ سوار سارے بندے موقعے اُتے ای دم توڑ گئے۔ سوشل میڈیا اُتے وائرل ہون والیاں ویڈیو وچ امدادی کارکناں نوں ملبے توں لاشاں کڈھدے ویکھیا جا سکدا اے۔
ایس ظالمانہ اسرائیلی حملے وچ 2 بالاں سمیت 8 جنے جاں بحق ہو گئے نیں جیہناں دی پچھان کیتی جا رہی اے، جدکہ پچھلے 24 گھنٹیاں وچ مرن والیاں دی گنتی 13 ہو گئی اے تے دو درجن دے قریب لوک زخمی ہوئے نیں۔
دوجے پاسے اسرائیلی فوج دا دعویٰ اے جے اوہناں نے صرف حزب اللہ دے ٹھکانیاں، اسلحہ ڈیپوواں تے راکٹ لانچراں نوں نشانہ بنایا اے کیوں جے اوتھوں اسرائیلی فوجیاں اُتے راکٹ تے ڈرون حملے کیتے جا رہے سن۔
میڈیا رپورٹ دے مطابق، 2 مارچ توں جاری ایس لڑائی وچ لبنان وچ ہن تیکر 2 ہزار 800 توں ودھ بندے مارے جا چکے نیں، جیہناں وچ تقریباً 200 بچے شامل نیں۔
