بانی پی ٹی آئی نوں قیدِ تنہائی وچ رکھن دے خلاف نویں درخواست دائر
علیمہ خان نے بیرسٹر سلمان صفدر تے سلمان اکرم راجہ دے راہیں اسلام آباد ہائی کورٹ وچ درخواست دائر کیتی جس وچ استدعا کیتی گئی کہ بانی پی ٹی آئی نوں قیدِ تنہائی وچ رکھن نوں غیر قانونی قرار دتا جاوے۔
عدالت توں استدعا کیتی گئی اے کہ عدالتی حکم توں بغیر تنہائی وچ قید رکھنا غیر قانونی قرار دتا جاوے، کسی وی عدالت نے بانی پی ٹی آئی نوں تنہائی وچ قید دی سزا نہیں سنائی، تعزیراتِ پاکستان جیل رولز دے تحت ایہو جہی قید غیر قانونی تے اختیاراں توں تجاوز اے۔
درخواست وچ موقف اختیار کیتا گیا کہ جیل رولز دے مطابق کسی وی قیدی نوں اکو ویلے وچ 14 دن توں ودھ تنہائی وچ نہیں رکھیا جا سکدا، بانی پی ٹی آئی دی تنہائی وچ قید نوں آئین دے آرٹیکل 9 تے 14 دی خلاف ورزی قرار دتا جاوے۔
اقوامِ متحدہ دے نیلسن منڈیلا رولز دے تحت وی غیر معینہ مدت تیکر تنہائی وچ قید رکھنا انسانی وقار دے خلاف اے، بانی پی ٹی آئی دی سجی اکھ دی بینائی 85 فیصد ختم ہوچکی اے، بانی پی ٹی آئی دی سجی اکھ وچ شدید تکلیف پاروں اوہناں نوں چار واری پمز ہسپتال منتقل کیتا گیا۔
