کیہ پاپارازی نے کانز فلم فیسٹیول وچ عالیہ بھٹ نوں نظر انداز کر دتا؟ سوشل میڈیا تے دلچسپ تبصرے
بالی وڈ اداکارہ عالیہ بھٹ کانز فلم فیسٹیول وچ فوٹوگرافرز ولوں نظر انداز کیتے جان تے سوشل میڈیا تے چرچے وچ نیں۔ فرانس وچ کانز فلم فیسٹیول سجایا گیا اے جس وچ دنیا بھر دے وکھو وکھ ستاریاں نے شرکت کیتی۔ ریڈ کارپٹ تے عالیہ بھٹ نے آسٹریلوی فیشن ڈیزائنر تمارا رالف دا ڈیزائن کیتا ہویا ہلکے گلابی رنگ دا لباس پایا ہویا سی۔
پر ایس واری اداکارہ دا کانز لُک اینا وائرل نہیں ہویا جینا اوہ فوٹوگرافرز ولوں نظر انداز کیتے جان پاروں وائرل ہوئیاں نیں۔ سوشل میڈیا تے اک ویڈیو وائرل ہو رہی اے جس وچ اداکارہ نوں پورے اعتماد نال ریڈ کارپٹ تے واک کردیاں تے فیر فوٹوگرافرز دے اگے پوز دیندیاں ویکھیا جا سکدا اے، جد کہ ویڈیو وچ فوٹوگرافرز ریڈ کارپٹ تے موجود دوجیاں مشہور شخصیتاں دیاں تصویراں کھچدے رہے۔ بہت تھوڑے ای کیمرے ایسے سن جنہاں نال اداکارہ دی تصویر لئی گئی۔
ایس ویڈیو دے وائرل ہون توں بعد سوشل میڈیا تے طرح طرح دے تبصرے جاری نیں۔ اک صارف نے ویڈیو شیئر کردیاں کیپشن وچ لکھیا کہ “ایہ وڈے دکھ دی گل اے، عالیہ بھٹ فیسٹیول وچ دوجی واری آئی نیں پر کوئی اوہناں نوں جاندا ای نہیں، کسے نے تصویر تک نہیں لئی”۔
اک صارف نے مخول (مذاق) کردیاں لکھیا کہ “اداکارہ ایویں ہتھ ہلا رہی اے جیویں اوہ خبراں وچ چھا جائے گی، جد کہ ایس دوران کیمرے ہوائی جہاز (Airplane mode) دے موڈ تے نیں”۔ اک صارف نے اداکارہ دا پکھ لیندیاں آکھیا کہ “کسے نوں فرق نہیں پیندا کہ فوٹوگرافر نے تصویراں لئیاں یا نہیں، عالیہ بھٹ فیسٹیول وچ بھارت دی نمائندگی کر رہی نیں”۔
