ایرانی اداکارہ نوں غیرمناسب میسج بھیجن تے گھر والی نے فرانسیسی صدر میکرون نوں تھپڑ ماریا سی، کتاب وچ انکشاف
فرانسیسی صدر میکرون نوں 2025 وچ اوہناں دی گھر والی تے خاتونِ اول بریجیٹ میکرون ولوں جہاز وچ تھپڑ مارے جان دی وجہ سامنے آ گئی اے۔ فرانسیسی خاتون صحافی فلورین تاردیف دی نویں کتاب وچ صدر میکرون دے بارے انکشاف کیتا گیا اے کہ خاتونِ اول بریجیٹ نے صدر میکرون دے موبائل فون تے کجھ پیغام ویکھ لئے سن۔
کتاب وچ دعویٰ کیتا گیا اے کہ صدر میکرون نے ایرانی اداکارہ گل شفتے فرحانی نوں غیر مناسب میسج گھلے (بھیجے) سن، صدر میکرون تے خاتونِ اول دی جہاز وچ سخت بحث ہوئی سی۔ کتاب دے مطابق 48 سالہ صدر میکرون دا 42 ورھیاں دی گل شفتے فرحانی نال کئی مہینیاں تیکر تعلق رہیا۔ دعویٰ کیتا گیا اے کہ صدر میکرون نے اک میسج وچ ایرانی اداکارہ نوں آکھیا سی کہ اوہ بہت سوہنی لگدی اے۔
رپورٹ دے مطابق خاتونِ اول دی سہیلی نے لکھاری نوں دسیا کہ بریجیٹ نوں میسجاں توں ودھ ایس گل دا دکھ سی کہ اوہناں نوں لگیا جیویں اوہناں نوں ہولی ہولی مٹایا جا رہا اے۔ خبر ایجنسی دے مطابق فرانسیسی خاتونِ اول دے نمائندے نے کتاب دے دعوے نوں جھوٹا قرار دیندیاں آکھیا اے کہ بریجیٹ اپنے شوہر دا فون چیک نہیں کردیں۔ دوجے پاسے ایرانی اداکارہ گل شفتے فرحانی نے وی صدر میکرون نال تعلق توں انکار کیتا اے۔
یاد رہے کہ پچھلے سال مئی وچ ویتنام پہنچن تے فرانسیسی صدر دے جہاز دا بوہا (دروازہ) کھلیا تے صدر میکرون دے مونہہ تے وجدے ہتھ نے کیمریاں دی توجہ کھچ لئی، جس توں بعد فرانسیسی صدر نے شرمندگی نال کیمریاں ول ویکھ کے ہتھ ہلایا۔ واقعے دی ویڈیو سوشل میڈیا تے جنگل دی اگ وانگوں پھیل گئی سی جس وچ آکھیا گیا کہ فرانسیسی خاتونِ اول نے صدر نوں تھپڑ مار دتا اے۔ پر واقعے توں بعد صدر میکرون نے صحافیاں نوں آکھیا سی کہ اوہ اپنی گھر والی نال ہاسی مخول (مذاق) کر رہے سن۔
