چینی صدر نے آبنائے ہرمز کھولن وچ مدد دی پیشکش کیتی اے: ڈونلڈ ٹرمپ
چین دے دورے تے موجود امریکی صدر ڈونلڈ ٹرمپ نے آکھیا اے کہ چینی صدر شی جن پنگ نے آبنائے ہرمز کھولن وچ مدد دی پیشکش کیتی اے۔
امریکی صدر ڈونلڈ ٹرمپ نے اک ٹی وی انٹرویو وچ دسیا کہ چینی صدر نے آکھیا اے کہ جے اوہ ایران دے معاملے تے کوئی مدد کر سکدے نیں تے اوہ تیار نیں، چین ایران توں بہت سارا تیل خریددا اے تے اوہ ایہ خریدداری جاری رکھنا چاہے گا۔
ٹرمپ نے آکھیا کہ چین آبنائے ہرمز نوں کھلا ویکھنا چاہندا اے، تے چینی صدر ایران تے امریکہ دے وچکار معاہدہ ہون دے حق وچ نیں۔ امریکی صدر دا ایہ وی کہنا سی کہ چین ایران نوں فوجی سازو سامان نئیں دے گا، تے چین نے 200 بوئنگ جیٹس آرڈر کرن تے وی اتفاق کیتا اے۔
ایس توں پہلاں بیجنگ دے “گریٹ ہال آف پیپل” وچ امریکی صدر ڈونلڈ ٹرمپ دے اعزاز وچ دتے گئے رات دے کھانے (عشائیے) نال خطاب کردیاں چینی صدر شی جن پنگ نے امریکہ نوں اک وار فیر شراکت داری دی پیشکش کیتی۔ اوہناں نے دو پاسی عزت تے مبنی تعلقات نوں امریکہ تے چین دے وچکار سب توں اہم قرار دتا۔
چینی صدر نے آکھیا کہ امریکہ تے چین دو عظیم قوماں نیں، ایہناں نوں حریف نئیں بلکہ پاٹنر (شراکت دار) ہونا چاہیدا اے۔ اوہناں نے ایہ وی آکھیا کہ امریکہ نوں دوبارہ عظیم بنان دا صدر ٹرمپ دا نعرہ (سلوگن) چینی ترقی دے نال میل کھاندا اے۔
