قومی کرکٹرز دے نویں سینٹرل کنٹریکٹ وچ وڈے پیمانے تے ردو بدل دا امکان
قومی کرکٹرز دے نویں سینٹرل کنٹریکٹ وچ وڈے پیمانے تے ردو بدل دا امکان اے۔
موجودہ سینٹرل کنٹریکٹ دا فنانشل ماڈل 30 جون نوں مک جائے گا، جدکہ نویں کنٹریکٹ دی مدت یکم جولائی توں شروع ہووے گی۔ پی سی بی دے چیئرمین محسن نقوی فنانشل ماڈل دے بارے حتمی فیصلہ کرن گے۔
پی سی بی دے سابق چیئرمین ذکا اشرف دے دور وچ 2023 وچ تن سالاں لئی اک فنانشل ماڈل لیایا گیا سی، جیہنوں محسن نقوی دے دور وچ بدلیا تے نئیں گیا پر فٹنس تے کارکردگی دی بنیاد تے کھڈاریاں دیاں کیٹیگریاں وچ تبدیلی کیتی جاندی رہی۔ ہن یکم جولائی توں نویں کنٹریکٹ شروع ہونے نیں، جیہدے لئی کھڈاریاں دے ناواں بارے مڈھلی گل بات جاری اے۔
پچھلے سال 30 کرکٹرز نوں سینٹرل کنٹریکٹ دتا گیا سی، تے ایہ پہلی وار ہویا سی کہ “اے کیٹیگری” وچ کوئی وی کھڈاری شامل نئیں سی۔
ذریعیاں دا کہنا اے کہ نویں کنٹریکٹ وچ وڈیاں تبدیلیاں کیتیاں جان گیاں۔ کئی کھڈاریاں دی کیٹیگری تھلے ڈگ جائے گی تے کجھ دی ترقی ہووے گی۔ محمد نواز، عبداللہ شفیق، فہیم اشرف، حسین طلعت تے خوشدل شاہ دی شمولیت دا امکان گھٹ اے، جدکہ اذان اویس تے عبداللہ فضل سمیت ڈومیسٹک وچ چنگا کھیڈن والے نویں منڈیاں نوں شامل کیتے جان دی امید اے۔
