قوم پریشان

لکھت:عتیق انور راجا

حالیہ دناں وچ ملک انتہائی نامساعد حالات دا شکار اے۔ اک توں بعد اک نواں مسئلا کھڑا ہو رہیا اے یا جان بجھ کے کھڑا کیتا جا رہیا اے قوم پریشان اے کہ ایہہ کیہ ماجرہ اے۔ روزمرہ استعمال دیاں شیواں اک توں بعد اک عوام دی پہنچ توں نکلدیاں جا رہیاں نیں۔ اک پاسے کرونا وائرس دی وجہ نال لوکاں دیاں زندگیاں مشکل وچ نیں۔ لکھاں لوک بے روز گار ہو چکے نیں، بوہت سارے سفید پوش حالات دے ہتھوں مجبور ہو کے احباب دے سامنے ہتھ پھیلان تے مجبور نیں تے دوجے پاسے آٹا، گھیو، کھنڈ، فروٹ، سبزیاں تے دوجیاں گھریلو شیواں دیاں قیمتاں ہر دوجے دن ودھ رہیاں نیں۔ کھنڈ تے آٹے دے حوالے نال جیہڑیاں ہن تیکر خبراں سامنے لیائیاں جا رہیاں نیں ایہناں دے مطابق ساری سیاسی جماعتاں دے لوکاں نے عوام نوں خوب لٹیا اے۔ یعنی ساڈے سیاست دان جیہڑے ہر ویلے دوجی پارٹی دے سیاستداناں تے تنقید کرنا اپنا اہم فرض سمجھدے نیں اوہ سارے اپنے اپنے ذاتی فائدے لئی یکجا ہو سکدے نیں۔ کنج دی بدقسمتی اے کہ ملک وچ صرف مخصوص گروپ کھنڈ تیار کرن دے اہل قرار دتے گئے نیں۔ آٹے تے گھیو تے وی ایہناں لوکاں دی اجارہ داری اے اک ویلا سی کہ پٹرول دیاں قیمتاں ودھن نال باقی ہر شے دی قیمت ودھا دتی جاندی سی پر پچھلے دو تن مہینیاں وچ پٹرول دیاں قیمتاں تے مسلسل گھٹ ہو رہیاں نیں ایس کمی دا فائدہ عوام نوں نہیں اپڑ رہیا۔ ہن پچھلے کجھ دن توں پٹرول دیاں قیمتاں اک وار فیر گھٹ ہوئیاں نیں پر ایس وار پٹرول پمپاں تے پٹرول مل ای نہیں رہیا۔
پٹرول دا سرکاری ریٹ اگرچے 75 روپئے اے پر بلیک وچ ایہو پٹرول اج کل اک سو 25توں اک سو پجاہ روپئے وچ وک رہیا اے۔ پٹرول مالکان اپنے پرانے سٹاک نوں پرانی قیمتاں تے ویچنا چاہندے سن انج ممکن نہ ہون تے اوہناں نے پمپاں تے پٹرول دستیاب نہیں اے کہہ کے بورڈ لا کے عوام نوں منی پٹرول پمپاں توں مہنگا خریدن تے مجبور کیتا ہویا اے۔ انج لگدا اے مافیاز دی طرفوں ریاست دی رٹ نوں بار بار چیلنج کیتا جا رہیا اے۔ بار بار طاقتور لوک اپنی مرضی نال روز مرہ استعمال دیاں شیواں دی قیمتاں ودھا رہے نیں جدوں چاہندے نیں ایکا کر کے مارکیٹ وچ شوشا چھڈ دیندے نیں کہ فلاں شے دی کمی ہو رہی اے۔ لوک ایس شے دی خریداری نوں دیوانہ وار نکلدے نیں تے ناجائز منافع کمان والیاں دی چاندی ہو جاندی اے۔ رمضان توں صرف داہ دن پہلے تیکر پیاز چالی روپئے کلو وک رہیا سی پر رمضان توں دو دن پہلے ایس پیاز دی قیمتاں ستر روپئے مقرر کروا دتی گئی کوئی دسے کہ ملک وچ پیدا ہون والا ایہہ پیاز جیہڑا ہر گھر دی لوڑ اے۔ اینوں مخصوص دناں وچ مہنگا کرن تے انتظامیہ کیوں چپ سادھ لیندی اے۔ حکومت تے انتظامیہ نوں تے چھڈو عوام کیوں ایس تے اواز اُچی نہیں کردے۔ کیوں عوام فیر وی دگنی قیمت تے پیاز دھڑا دھڑ خریدے جا رہے سن، عید توں بعد ہن فیر اوہ ای پیاز چالی روپئے دے کول کول کنج وک رہیا اے؟
ایس لٹ مار تے کسے طرفوں احتجاج نہیں کیتا جا رہیا یقینا ایس لئی کہ اسیں اپنے ہر تہوار تے انج دی مصنوعی مہنگائی دے عادی ہو چکے آں۔ ایس حکومت توں لوکاں نوں امید سی کہ ایہہ مافیا نوں نتھ پائے گی۔ وزیراعظم دے بیان توں لگدا اے کہ اوہ چوراں نوں چھڈنا نہیں چاہندے اج کل میرے ملک دے میڈیا تے اک امریکی خاتون سنتھیارچی دے بوہت چرچے ہو رہے نیں۔ دسیا جا رہیا اے کہ اک جواں سال خوبصورت امریکی خاتون سنتھیارچی پچھلے کئی ورھیاں توں پاکستان وچ مصروف عمل اے۔ایس دوران اوہ پاکستان دے شہر شہر قریہ قریہ گھم کے پاکستان دا روشن چہرہ دنیا نوں وکھان دی کوشش کردیاں رہیاں نیں۔ تے ہن ایس نے اچانک پیپلز پارٹی دی اعلیٰ قیادت تے الزام دا سلسلا شروع کر دتا اے، سوشل میڈیا تے ایس دے بیان توں پتہ چل رہیا اے کہ پیپلز پارٹی دے بعد نون لیگ دے قائد وی ایس دے الزام دی زد وچ آن والے نیں۔ ایہناں الزاماں وچ کیہ حقیقت اے کیہ فسانہ اے ایہہ سب سامنے آندا اے یا نہیں، ایس تے ہجے کجھ کہنا فضول گل اے پر جے اسیں اپنی تریخ تے نظر پائیے تے سانوں پتہ چلدا اے کہ ساڈے حکمران ہر دور وچ گوری چمڑی تے فلم نگری دی حسینائواں دے دیوانے رہے نیں تے ہن تے ٹک ٹاک والیاں کڑیاں ساڈے سیاست داناں نوں ماموں بنا رہیاں نیں ایہناں سب نوں ویکھدے ہوئے اج کل عوام صحیح معنیاں وچ پریشان اے کہ ایہہ ہو کیہ رہیا اے؟