بھارت اگ نال کھیڈ رہیا اے!
تحریر :شاہد ندیم احمد
بھارت دنیا دا واحد انج دا ملک اے کہ جس دے اپنے گوانڈھیاں دے نال نہ صرف تنازعات نیں بلکے ایس دی اپنے ہر گوانڈھی دے نال مسلح چھڑپاں تے جنگاں دی اک تریخ اے۔ ایس دی وجہ ایہہ اے کہ بھارت وچ جیہڑی وی سرکار آئے، ایس دے کول اپنے عوام دی مسائل توں توجہ ہٹان دا اکو آزمودہ نسخہ اپنے گوانڈھی پاکستان دے نال کشیدگی وچ وادھا کرنا اے۔ بھارت اک انج دا وڈا ملک اے جس دے مسائل وی بے شمار نیں تے ایس دے حکمران اپنے عوام دے مسائل حل کرن دے بجائے کدی اندرونی محاذ تے منافرت ودھاندے نیں تے کدی گوانڈھیاں نوں سرجیکل اسٹرائیک دیاں دھمکیاں دینا شروع کر دیندے نیں۔ بھارت دے وزیر داخلہ امیت شاہ نے براہ راست پاکستان نوں دھمکی دیندے ہوئے کہیا اے کہ مودی نے پاکستان تے حملے دی اجازت دے دتی اے۔ بھارتی سرکار نوں بار بار پاکستان دے خلاف بیان دین دی ہمت ایس لئی ہو رہی اے کہ 5 اگست نوں مقبوضہ جموں و کشمیر تے لداخ دی خصوصی حیثیت ختم کرن تے پاکستان نے چین دی طرح بھارت نوں سخت جواب نہیں دتا سی۔ بھارت دی سمجھ وچ چنگی طرح آ گیا اے کہ پاکستانی حکمران مفاہمتی پالیسی تے گامزن نیں ، ایس لئی پاکستان دے نال جیہڑا جی چاہے کیتا جا سکدا اے۔ بھارت سخت غلط فہمی دا شکار ہو گیا اے کہ پاکستان نے اپنی شہ رگ دی خصوصی حیثیت تبدیل ہون تے کوئی موثر احتجاج نہیں کر رہیا تے مزید پاکستانی علاقیاں تے قبضہ کرن تے وی کوئی مزاحمت نہیں ہوئے گی۔ بھارت دی ہن اینی ہمت ودھ گئی اے کہ اوہ پاکستان تے قبضے دیاں گلاں کرن لگیا اے۔ ایہہ پاکستان لئی چنگا موقع اے کہ طاقت دا جواب طاقت نال دیوے تے مودی سرکار نوں دھمکی دین دا سبق سکھا دیوے۔ چین نے جس طرح قوت نال اپنا حق کھویا اے، ایسے طرح پاکستان وی بھارت نوں ایس دی حدود وچ رکھ سکدا اے، ایہو کشمیریاں دے نال پاکستانی عوام دے دل دی اواز اے۔
ایہہ امر واضح اے کہ پاکستان خطہ امن لئی جنگ دی بجائے گل بات دے ذریعے درینہ مسائل دے حل دا خواہاں رہیا اے تاں ایس دا مطلب ہر گز نہیں کہ بھارتی سرکار سرجیکل اسٹرائیک دیاں دھمکیاں دینا شروع کر دیوے۔ آرمی چیف جنرل قمر باجوہ بھارت نوں پہلے ای تنبیہ کر چکے نیں کہ اگ نال نہ کھیڈو، ایس دے نتیجے بوہت خطرناک ہون گے۔ انج دی صورت حال وچ بھارتی وزیراعظم نوں زیب نہیں دیندا کہ بڑھکا مارنا شروع کر دیوے۔ پاکستانی وزارت خارجہ دی ترجمان عائشہ فاروقی نے وی اپنا رد عمل دیندے ہوئے واضح کیتا کہ انڈیا نوں فروری 2019ء نوں فراموش نہیں کرنا چاہیدا۔ پاکستان، انڈیا دی ایہناں بڑھکاں تے گیڈر بھبکیاں توں مرعوب ہون والا نہیں کہ ایہہ بازو ایس دے آزمائے ہوئے نیں۔ انڈین وزیر داخلہ نوں پتا ہونا چاہیدا اے کہ جے ایہناں دا کوئی کواڈ کاپٹر صرف تن فرلانگ پاکستانی سرحد نوں پار کردا اے تے ایس نوں مار دتا جاندا اے؟
ایس قسم دے 8ڈرون قبل ازیں پاکستانی فورسز دی طرفوں ڈیگے جا چکے نیں۔ جے ایہہ ڈرون کسے سرجیکل سٹرائک دے روٹ دی ریکی لئی ارسال فرمائے گئے سن تے ایہناں دا حشر تے بھارت نے ویکھ لیا اے۔ ایہناں ای راہواں تے جے کل کلاں کسے انڈین سکیورٹی فورس نے وی کسے سرجیکل وارن دی کوشش کیتی تے ایس دا انجام اوہ ای ہوئے گا جیہڑا 8 عدد ڈروناں دا ہویا اے۔
ایہہ اک مسلم حقیقت اے کہ بھارت جدوں وی اندرونی خلفشار دا شکار ہوندا اے تے عوام اینوں دفاعی پالیسیاں تے آڑے ہتھ لیندے نیں تے گوانڈھیاں دے نال انج لڑائیاں دیاں گلاں کردا اے۔ بھارت وچ لداخ دے معاملے تے عوام وچ اک بے چینی پائی جاندی یاے، ایس دی بابت دانشور صحافی، اداکار، کھلاڑی تے سیاسی جماعتاں سوال پچھدے نیں ۔ بھارتی وزیر داخلہ سوالاں دے جواب دین دی بجائے ایہناں نوں رام کرن لئی انج دے بیان دیندے نیں۔ بھارت نے لائن آف کنٹرول تے باقاعدہ اک جنگی ماحول بنا رکھیا اے۔ بھارتی سکیورٹی فورسز دی طرفوں مئی 2020 تیکر 1102 وار کنٹرول لائن تے جنگ بندی دی خلاف ورزی کرن دے نال مسلسل جاسوسی دی غرض نال کواڈ کاپٹر پاکستان گھل رہیا اے۔پاکستان اپنی حدود وچ وڑن والے ہن تیکر 8بھارتی کواڈ کاپٹر تباہ کر چکیا اے۔ پاکستان نے بار بار عالمی برادری دی توجہ بھارتی جارحیت دی طرفوں مبذول کروائی اے پر بدقسمتی نال عالمی برادری ایس دا نوٹس نہیں لے رہی ۔ بھارت نے اک وار فیر اشتعال انگیزی کردے ہوئے ایئر سرجیکل سٹرائیک کرن دی گیدڑ بھبکی دتی اے حالاں کے اوہ ایس گل توں بخوبی آگاہ اے کہ پاک فوج بھارت دے انج دے جارحانہ عزائم دے توڑ لئی ہمہ وقت چوکس اے۔
پاکستانی عوام نوں اپنے غیور بہادر فوجی جواناں تے فخر اے۔ پر پاکستانی حکمران طبقہ ، اگر ، مگر چوںکے چنانچے وچ پھسیا ہویا اے جے بدلدے حالات دا ادراک نہ کردے ہوئے ماضی وانگوں چشم پوشی دا مظاہرہ کیتا گیا تے فیر کجھ ہفتے بعد ای بھارت اک پاسے ادھے پاکستان نوں سیلاب وچ ڈبوئے گا تے دوجے پاسے ایس دیاں فوجاں کنٹرول لائن پار کر کے پاکستانی علاقیاں تے قبضے دی ناپاک جسارت کر رہیاں ہون گیاں۔ تریخ گواہ اے کہ ارض وطن دی حفاظت محض بُرا بھلا کہن نال نہیں ہویا کردی، ایس لئی دلیرانہ ذہن تے بہتر حکمت عملی دے نال میدان عمل وچ نکلنا پیندا اے۔ پاکستانی سرحد دے نال کنٹرول لائن دے ایس پار ہوائی اڈیاں دی تعمیر تے بھارتی فوجی مشینری دی نقل و حرکت بھارتی عزائم آشکار کرن لئی کافی اے تے ایس تے مودی سرکاری دیاں دھمکیاں خطے وچ وگڑدی صورت حال واضح کر رہی اے، بہتر ہوئے گا کہ پاکستان دے حقیقی حکمران وی نوشتہ دیوار پڑھ لین تے بھارت نوں حقیقی دندان شکن جواب دین لئی تیار ہو جان۔ بھارت نے اگ نال کھیڈ نا شروع کر دتا اے، حکومت اک وار بھارتی سرکار دی لائی اگ وچ مٹی پان دا حوصلہ کرے، قوم ایہناں دے نال سیسہ پلائی ہوئی کندھ وانگوں کھڑی نظر آئے گی۔
