بھارت وچ شوہردے دوجے ویاہ دی تقریب وچ پہلی وہوٹی اپڑ گئی
بھارت وچ اک بندے دے دوجے ویاہ دی تقریب وچ پہلی وہوٹی (بیوی) نے سٹیج اتے چڑھ کے کھلار پا دتا (ہنگامہ کھڑا کر دتا)۔
بھارتی میڈیا دی رپورٹ دے مطابق ایہ حیران کرن والا واقعہ بھارتی ریاست اتر پردیش دے ضلع ’بستی‘ وچ ایسے ہفتے پیش آیا، جِتھے ونے آنند شرما ناں دے بندے دے ویاہ دی تقریب چل رہی سی کہ ایسے دوران ونے دی پہلی وہوٹی ریشما اپنے ٹبر (خاندان) نال سٹیج اتے آپہنچی۔
ریشما نے الزام لاؤندیاں آکھیا کہ ونے قانونی طور اتے اودا خاوند اے، پر اودے باوجود اوہ دوجا ویاہ کر رہا اے۔ ریشما نے ویاہ وچ آئے پرانہیاں (مہماناں) نوں ونے نال اپنے ویاہ دیاں تصویراں وی وکھایاں تے دعویٰ کیتا کہ ونے نے اودے کھاتے (اکاؤنٹ) چوں وڈی رقم کڈھوائی ہوئی اے، ایتھوں تک کہ اودے ناں اتے گڈی دی فنانسنگ وی کروائی ہوئی اے۔ بھارتی میڈیا دے مطابق ریشما تے ونے نے 2022 وچ کورٹ میرج کیتی سی، جیدے توں بعد دوواں ٹبراں دی موجودگی وچ اوہناں دے ویاہ دی تقریب وی ہوئی سی۔ پر ویاہ دے کجھ مہینیاں بعد ہی آپسی ان بن (اختلافات) پاروں دوواں ولوں طلاق دا کیس دائر کر دتا گیا۔ طلاق دی کارروائی چل رہی سی، پر قانونی طور اتے دوواں وچ اجے تیکر طلاق نئیں ہوئی سی۔
میڈیا رپورٹ دے مطابق ونے حالے پچھے جیہے اپنے پنڈ واپس آیا سی جِتھے اودے گھر والیاں نے اودے دوجے ویاہ دیاں ساریاں تیاریاں کیتیاں ہوئیاں سن۔ ونے اپنے ٹبر نال جڈوں جنج (بارات) لے کے اپڑیا تاں اوہ ایس گل توں بے خبر سی کہ اودے دوجے ویاہ دی خبر اودی پہلی وہوٹی ریشما نوں ہو جائے گی تے اوہ اپنے گھر والیاں نوں نال لے کے تقریب وچ پہنچ کے ویاہ رکوا دیوے گی۔ ویاہ دی تقریب وچ ہون والے کھپ پئے (ہنگامے) دی اطلاع جڈوں پولیس نوں دتی گئی تاں پولیس لاڑے (دولہا) سمیت دوواں دھریاں (فریقین) نوں تھانے لے گئی۔ پولیس دے مطابق ونے دی پہلی وہوٹی ولوں دائر طلاق دا کیس اجے لمکا ہویا (زیر التوا) اے، جیدے پاروں ونے دے دوجے ویاہ دا معاملہ وی پہلی شادی دے مکن تیکر لٹک گیا اے۔
