گڈے نال ویاہ کرن والی زنانی دوجی واری ماں بن گئی

برازیل وچ گھر والے دی بے وفائی توں بعد اک بے جان گڈے (کٹھ پتلی) نال ویاہ کرن والی زنانی نے دوجی واری ماں بنن دی خوشخبری سنا دتی اے۔ میل آن لائن دے مطابق 37 سالاں دی میئریون روشا موریس ناں دی ایہ زنانی پچھلے کجھ سالاں توں مرد ورگے گڈے نال ویاہ کرن پاروں کئی واری میڈیا دی وڈی سرخیاں وچ آ چکی اے تے سوشل میڈیا اتے وی کافی مشہور اے۔

میئریون روشا موریس نے پچھے جیہے اپنے ٹک ٹاک کھاتے (اکاؤنٹ) اتے اک ویڈیو شیئر کیتی اے، جیدے وچ اوہنے دسیا اے کہ اوہ دوجے بچے دی ماں بنن والی اے تے ایس واری اودے ڈھڈ وچ دھی (بیٹی) پل رہی اے۔ خاتون دی ایہ ویڈیو وی بڑی تیزی نال وائرل ہو رہی اے، جیہنوں ہن تیکر 4 لکھ توں ودھ لوک ویکھ چکے نیں۔

رپورٹ دے مطابق میئریون روشا موریس نے اس گڈے نال باقاعدہ ویاہ کیتا سی، جیویں کسے لاڑے لاڑی دا ویاہ ہوندا اے۔ اوہنے اپنے ویاہ وچ 250 پرانہیاں (مہماناں) نوں سدیا سی تے اک وڈی تقریب کیتی سی۔ میئریون روشا موریس نے اس گڈے دا ناں ’مارسیلو‘ رکھیا ہویا اے۔ اوہ اپنی ایس نویں ویڈیو وچ دسدی اے کہ ’’میں بہت خوش واں کیوں جے میں مارسیلو دے دوجے بچے دی ماں بنن والی واں۔ ایس واری ساڈے گھر دھی جمے گی۔‘‘

یاد رہے کہ میئریون روشا موریس اک خوش حال شادی شدہ زندگی لنگھا رہی سی، جڈوں اودے گھر والے دی بے وفائی اوہدے اتے قیامت بن کے ٹٹی تے اوہنے اپنے خاوند توں طلاق لے لئی۔ طلاق توں بعد اوہ اس بے جان گڈے دے پیار وچ پاگل ہو گئی تے اوہدے نال ویاہ رچا لیا۔