قربانی لئی لیاندا گیا لکھاں روپے دا چوری ہویا ڈنگر پولیس نے کیویں لبھیا؟
لاہور دے علاقے مناواں دی پولیس نے قربانی لئی لیاندا گیا لکھاں روپے دی مالیت دا چوری ہویا وچھا (بچھڑا) لبھ کے ملزم نوں گرفتار کر لیا اے۔
تفصیلات دے مطابق مناواں پولیس نوں شہری عرفان نے قربانی دا ڈنگر چوری ہون بابت شکایت درج کروائی سی، جس توں بعد پولیس نے سی سی ٹی وی فوٹیجز اپنے قبضے وچ لے کے تفتیش شروع کیتی۔ پولیس نے کج گھنٹیاں دے اندر اندر ای ملزم نوں نپ (گرفتار کر) لیا تے قربانی لئی لیاندا گیا وچھا برآمد کر کے مالک دی مدعیت وچ پرچہ درج کر لیا۔
ایس پی کینٹ نے دسیا کہ ملزم نوں سی سی ٹی وی فوٹیج وچ چوری کیتا ہویا قربانی دا وچھا لے کے جاندے ہوئے صاف دیکھیا جا سکدا اے۔ ڈی آئی جی آپریشنز لاہور ولوں ایس پی کینٹ نوں ملزم نوں پھڑن لئی اک خاص ٹاسک دتا گیا سی۔ ایس پی کینٹ اختر نواز دی اگوانہی (سربراہی) وچ ملزم نوں فوراً گرفتار کرن لئی ٹیماں بنائیاں گئیاں، تے چند گھنٹیاں وچ ای ایس ایچ او مناواں ذوالقرنین نے پولیس ٹیم دے نال سی سی ٹی وی فوٹیج تے نویں ٹیکنالوجی دی مدد نال ملزم امین نوں چوری کیتے ہوئے وچھے سمیت گرفتار کر لیا۔
ایس پی کینٹ نے ہور دسیا کہ متاثرہ شہری محمد عرفان نے قربانی دا وچھا واپس ملن تے پولیس دا شکریا ادا کیتا تے ڈھیر ساریاں دعاواں دتیاں۔ ایس پی کینٹ نے ایس ایچ او مناواں ذوالقرنین تے پولیس ٹیم نوں شاباش دتی تے چوراں دے خلاف بنا کسے فرق دے کارروائیاں جاری رکھن دی ہدایت کیتی۔
