پرامن باہمی طرز زندگی دے فروغ لئی انتہا پسندی دا خاتمہ ضروری اے، مریم نواز
وزیر اعلیٰ پنجاب نے اپنے پیغام وچ آکھیا اے کہ حالیہ عالمی بحراناں دے دوران پاکستان نے اک امن پسند ملک دے طور تے اپنی پچھان (شناخت) نوں ہور مضبوط کیتا اے، جبکہ امن تے خوشحالی دے فروغ لئی پاکستان نے بھرپور خدمات سرانجام دتیاں نیں۔
اوہناں دا کہنا سی کہ دنیا وچ پاکستان دی امن پسند پچھان ہر پاکستانی لئی فخر دی گل اے تے پرامن، ہم آہنگ، متحد تے یکسو معاشرے دی بیسی (تشکیل) ساڈی سانجھی (اجتماعی) جدوجہد دا اہم حصہ اے۔
مریم نواز شریف نے آکھیا اے کہ پنجاب حکومت پرامن تے رواداری تے مبنی معاشرے دے قیام لئی پرعزم اے، اللہ تعالیٰ دے فضل و کرم نال پنجاب وچ امن و امان دی صورتحال ماضی دے مقابلے وچ بہتر تے مثالی ہو چکی اے۔
اوہناں نے آکھیا کہ پنجاب وچ ہر شہری رنگ، نسل تے مذہبی تعصب توں اتے اٹھ کے باوقار تے پرامن زندگی گزار سکدا اے، جبکہ لسانی، سماجی، مسلکی تے تہذیبی تناؤ دے خاتمے لئی وی اقدامات جاری نیں۔
مریم نواز شریف نے زور دتا کہ پرامن باہمی طرز زندگی دے فروغ لئی فکری تے عملی انتہا پسندی دا مکمل خاتمہ لازمی (ناگزیر) اے، سوانیاں (خواتین) نوں محفوظ تے بااختیار بناؤن دیاں کوششاں وی اصل وچ پرامن معاشرے دے قیام ول اک اہم قدم نیں، جبکہ تشدد دے خاتمے نوں یقینی بناؤن لئی قانونی اصلاحات وی لیاندیاں جا رہیاں نیں۔
وزیراعلیٰ پنجاب دا کہنا سی کہ قائد اعظم محمد علی جناح دے فرمودات دی روشنی وچ پرامن معاشرے دی تشکیل دا عزم پکا (غیر متزلزل) اے تے اللہ تعالیٰ دے فضل و کرم نال ہر پاکستانی امن، عزت تے باہمی احترام دے نال زندگی گزارن دے قابل اے۔
