پسند دی شادی تے پورے پنڈ نوں اگ لان والیاں دے خلاف مقدمہ درج، گرفتاریاں، تحقیقات لئی ٹیم بن گئی

“جیکب آباد وچ پسند دی شادی تے پورے پنڈ نوں سزا دے دتی گئی، ہتھیا ر بند بندیاں نے درجنوں گھراں نوں اگ لا دتی۔

جیو نیوز دے مطابق جیکب آباد دے گوٹھ محمد صدیق آرائیں وچ 5 مئی نوں پیش آؤن والا ہولناک واقعہ، جس وچ ہتھیا ربند بندیاں نے درجنوں گھراں نوں جلا کے سواہ (راکھ) کر دتا، ملزم نویں ہتھیا راں نال فائرنگ وی کردے رہے۔

ایس ایس پی جیکب آباد فیضان علی دے مطابق مڈھلی (ابتدائی) تفتیش دے مطابق پنڈ صدیق آرائیں تے پنڈ غازی خان چنہ دے جوڑے نے حیدرآباد دی عدالت وچ پسند دی شادی کیتی سی، جس تے ملزماں نے پسند دی شادی کرن تے پنڈ نوں اگ لائی۔ پولیس نے وکھو وکھریاں تھاواں تے چھاپے مار کے 5 ملزماں نوں گرفتار کر لیا اے۔

پرچے (مقدمے) وچ 12 نامزد تے 20 نامعلوم ملزماں دے خلاف انسدادِ دہشت گردی دیاں دفعات دے تحت مقدمہ درج کر لیا گیا اے۔ باقی ملزماں دی گرفتاری تے پچھ گچھ لئی ٹیم بنا دتی گئی اے۔

کئی دن لنگھ جان دے باوجود سارے ملزماں دی گرفتاری نہ ہون تے متاثرہ خاندان شدید پریشان نیں۔

اگ لان دے ایس واقعے نے درجنوں خانداناں نوں چھت توں محروم کر دتا اے، جیہڑے ہُن وی شدید گرمی وچ کھلے اسمان تھلے زندگی گزارن تے مجبور نیں۔”