اداکارآغا شیراز دی چاہون والیاں توں اپنی گھر والی دی ماڑی صحت لئی دعاواں دی اپیل
پاکستانی اداکار، میزبان تے پروڈیوسر آغا شیراز نے اپنی گھر والی دی خراب صحت تے چاہون والیاں توں بڑے دِل بھرے (جذباتی) انداز وچ دعاواں دی اپیل کیتی اے۔
آغا شیراز، جیہڑے ماضی وچ پی ٹی وی (PTV) دے منّے پرمنّے ڈرامیاں، سِٹ کامز تے دوجے شوبز پراجیکٹس وچ اپنی جاندار اداکاری پاروں وڈی شہرت رکھدے نیں، اوہناں نے سوشل میڈیا تے اپنی گھر والی دی ہسپتال توں کجھ تصویراں شیئر کیتیاں نیں۔ اداکار نے اپنی پوسٹ وچ لکھیا کہ: “میری گھر والی لئی تہاڈی دعاواں دی سخت لوڑ اے۔”
اوہناں نے اپنی اہلیہ لئی دِلی محبت دا اظہار کردیاں ہور لکھیا کہ: “میں تانوں کدی دَسیا تے نہیں، پر تُسیں ای میری زندگی دی اصل وجہ او، تُسیں میرا آسرا او، میری بیوی لئی دعا کرو، اللہ پاک تہاڈے ساریاں دی دعا قبول فرمائے، کیہ پتا کس دی زبان توں نکلی دعا تے میرا اللہ ‘کُن’ کہہ دیوے۔”
چیتے رہے کہ آغا شیراز ہوریں ایس توں پہلاں چالو سال جنوری 2026ء وچ دِل دا دورہ (ہارٹ اٹیک) پین پاروں خود وی ہسپتال وچ زیرِ علاج رہے سن، جس توں بعد اوہناں نے شوبز دی دنیا توں دوری اختیار کر کے دین اسلام دے راستے تے چلدیاں اپنی زندگی گزارنا شروع کر دتی سی۔
