“آسٹریلیا دی بگ بیش لیگ دا بھارت توں آغاز، کیہڑا شہر میزبانی کرے گا؟”

چنئی: آسٹریلیا دی مشہور ٹی ٹوئنٹی لیگ “بگ بیش لیگ” (بی بی ایل) دا آغاز ایس واری بھارت توں ہوئے گا۔

میڈیا رپوٹاں مطابق، بی بی ایل دا پہلا میچ دسمبر وچ بھارت وچ کھیڈیا جائے گا۔ بگ بیش لیگ دے سیزن دے پہلے میچاں دی میزبانی چنئی کرے گا، جس لئی کم شروع کر دتا گیا اے۔

رپورٹ وچ دسیا گیا اے کہ کرکٹ آسٹریلیا نوں تامل ناڈو کرکٹ ایسوسی ایشن تے بھارتی کرکٹ بورڈ (بی سی سی آئی) ولوں چنگا جواب ملیا اے، جس توں بعد کرکٹ آسٹریلیا نے بی بی ایل دے پہلے میچ لئی چنئی دے میدان دا انتخاب کیتا اے۔

میڈیا رپورٹ مطابق، کرکٹ آسٹریلیا دے اک 5 رکنی وفد نے چنئی وچ اک خاص میٹنگ وچ حصہ لیا سی۔ ایس آسٹریلوی وفد نے آئی پی ایل وچ چنئی سپر کنگز دا آخری ہوم میچ وی گراؤنڈ وچ بہہ کے ویکھیا سی۔ بھارتی میڈیا دا کہنا اے کہ وفد نے اسٹیڈیم تے دوجے انتظاماں دا جائزہ (ریکی) مکمل کر لیا اے، پر ہلے حکومتی سطح اتے معاملے طے ہونا باقی نے، جس توں بعد آخری فیصلہ کیتا جائے گا۔