بھارت وچ نشئی ٹاور تے چڑھ گیا، دلچسپ فرمائش کر دتی
بھارت وچ نشئی ٹاور تے چڑھ گیا، انوکھی فرمائش کر دتی
بھارت وچ اک جوان نشئی نے ٹاور تے چڑھ کے انوکھی فرمائش کر دتی۔
بھارتی میڈیا دے مطابق اے عجیب و غریب واقعہ ریاست آندھرا پردیش دے ضلع پرکاسم وچ پیش آیا، جہاں ہنومانتھو نامی جوان شہری موبائل فون دے ٹاور تے چڑھ گیا۔
میڈیا رپورٹاں وچ دسیا گیا اے کہ ہنومانتھو نے ٹاور تے چڑھن توں بعد سب دی توجہ کھچن لئی چیخ چہاڑا شروع کر دتا جیہدے تے لوک اکٹھے ہو گئے۔
عینی شاہداں دے مطابق جوان نے ٹاور تے چڑھن توں بعد نشے دی ڈیمانڈ کیتی تے آکھیا کہ “میں زمین تے ڈگ پواں گا، مینوں اک پیکٹ گانجا (نشہ) دتا جائے”۔ میڈیا رپورٹاں دے مطابق ہنومانتھو ٹاور تے بہت اچائی تے موجود سی جیہنوں تھلے آؤن لئی آکھیا گیا پر اوہ ہر واری نانہہ کر دیندا سی۔
واقعے دا پتہ لگدے ای پولیس تے ریسکیو ادارے وی موقعے تے پہنچ گئے جیہناں نے جوان نوں تھلے آؤن لئی راضی کرن دیاں کوششاں شروع کیتیاں۔ اوکھی محنت توں بعد پولیس جوان نوں ٹاور توں حفاظت نال تھلے لاہن وچ کامیاب ہو گئی، جیہدے توں بعد جوان نوں طبی معائنے تے علاج لئی نیڑے دے سرکاری ہسپتال منتقل کر دتا گیا۔
حکام ولوں شک ظاہر کیتا گیا اے کہ یا تے جوان جذباتی پریشانی دا شکار ہو سکدا اے یا پھر نشے دا عادی اے۔
