مومنہ اقبال دی ہراساں کرن دی شکایت اُتے این سی سی آئی نے پنجاب دے ایم پی اےنوں سدّ لیا
ایہہ پنجاب دے اک ایم پی اے (MPA) تے اداکارہ مومنہ اقبال دے وچکار دھمکیاں دا معاملہ ہور ودھ گیا اے۔ اداکارہ دی درخواست اُتے نیشنل سائبر کرائم انویسٹی گیشن ایجنسی (NCCIA) نے دوواں دھراں نوں اج طلب کر لیا اے۔
دوجے پاسے، اوہدے مقابلے وچ اوس ایم پی اے نے وی اپنے کزن دی مدعیت وچ اپنے آبائی ضلعے وچ نامعلوم بندیاں دے خلاف دھمکیاں دین دا پرچہ (مقدمہ) درج کروایا ہویا اے۔
اداکارہ مومنہ اقبال نے اپنی درخواست وچ ایہ الزام لایا سی کہ اوہناں نوں اک بااثر سیاسی شخصیت ولوں لمے چر توں آن لائن ہراساں کرن، سائبر بُلنگ، ذہنی دباؤ تے جانوں مارن دیاں دھمکیاں دا سامنا اے۔
اداکارہ نے انسٹاگرام اسٹوری اُتے اک تفصیلی بیان شیئر کردیاں کہیا سی کہ اوہناں نے ایس معاملے دیاں کئی وار این سی سی آئی اے، ایف آئی اے تے پنجاب پولیس نوں شکایتاں کیتیاں پر مبینہ سیاسی اثر و رسوخ پاروں کوئی کارروائی نہیں ہو سکی۔ مومنہ دے مطابق، انصاف دین دی بجائے اوہناں دا حوصلہ توڑیا گیا، جدکہ اوہناں نوں تے اوہناں دے ٹبر نوں شدید خطرے نیں۔
اوہناں نے اپنی پوسٹ وچ وزیر اعلیٰ پنجاب مریم نواز سمیت متعلقہ افسراں توں منگ کیتی سی کہ ایس معاملے دی صاف شفاف تے غیرجانبدارانہ تفتیش کیتی جائے تے اوہناں دے ٹبر نوں فوراً تحفظ دتا جائے۔ اداکارہ نے وڈے افسراں، اہم سرکاری دفتراں، نیوز چینلاں تے وکھو وکھرے میڈیا پلیٹ فارماں نوں وی اپنی پوسٹ وچ ٹیگ کیتا سی۔
اداکارہ نے اپنی اک ہور اسٹوری وچ این سی سی آئی اے ولوں ایکشن لین اُتے مریم نواز دا شکریا ادا کیتا تے نال ای ایہ وی کہیا کہ میرے آفیشل بیان ریکارڈ کروان توں پہلاں کسے اُتے الزام نہ لایا جائے تے نہ ای کسے دا ناں لیا جائے۔ مومنہ اقبال نے دَسیا کہ اوہناں نوں ہور وی سوانیاں (خواتین) دے میسج آ رہے نیں جنہاں نے ایسے ایم پی اے ولوں ہراساں کیتے جان دا دَسیا اے۔
