آسٹریلیا کیخلاف سیریز: رضوان نوں ڈراپ کر کے نویں وکٹ کیپرز نوں ازمان دا امکان
آسٹریلیا دے خلاف سیریز: رضوان نوں ڈراپ کر کے نویں وکٹ کیپرز نوں ازمان دا امکان
آسٹریلیا دے خلاف ون ڈے سیریز وچ پاکستانی وکٹ کیپر محمد رضوان نوں ڈراپ کیتے جان دا امکان اے۔
اطلاعواں دے مطابق، آسٹریلیا دے خلاف 3 ون ڈے میچاں دی سیریز لئی سلیکشن کمیٹی، کوچ مائیک ہیسن تے کپتان شاہین شاہ آفریدی دے وچکار صلاح مشورے توں بعد جیہڑی ٹیم چنی جا رہی اے، اوہدے وچ تجربے کار وکٹ کیپر تے سابق کپتان محمد رضوان دے شامل ہون دے چانس گھٹ ای نیں۔
ذرائع دا کہنا اے کہ مائیک ہیسن ٹی ٹوئنٹی توں بعد ون ڈے کرکٹ وچ وی محمد رضوان نوں ٹیم وچ رکھن دے حق وچ نہیں نیں۔ 33 سالہ محمد رضوان نے 103 ون ڈے میچاں وچ پاکستان لئی 40.08 دی اوسط نال 2979 رنز بنائے نیں، جیہدے وچ 4 سینچریاں تے 19 ہاف سینچریاں شامل نیں، جدکہ محمد رضوان نے بطور وکٹ کیپر 113 کیچ تے 7 اسٹمپ کیتے نیں۔
ایہدے توں ہٹ کے، مارچ 2026 وچ بنگلا دیش دے خلاف 3 ون ڈے میچاں وچ محمد رضوان نے 58 رنز بنائے سن۔
خبر دتی گئی اے کہ بنگلا دیش دے خلاف 15 مارچ 2026 نوں تیجے ون ڈے میچ وچ بطور بیٹسمین اپنا پہلا میچ کھیڈن والے غازی غوری (جیہڑے ٹیسٹ سیریز وچ وی ٹیم دے نال سن)، آسٹریلیا دے خلاف ون ڈے سیریز وچ اوہناں دے نال دوجے وکٹ کیپر لئی عثمان خان تے مرزا سعد بیگ وچوں کسے اک نوں چنیا جا سکدا اے۔
چیتے رہے کہ آسٹریلیا دی ٹیم 23 مئی نوں اسلام آباد پہنچ رہی اے۔ پاکستان دی ٹیم 22 مئی توں راولپنڈی وچ ٹریننگ شروع کرے گی تے اک پریکٹس میچ وی کھیڈے گی۔ شاہیناں تے کینگروز دے وچکار ون ڈے سیریز دے میچ 30 مئی، 2 جون تے 4 جون نوں کھیڈے جان گے۔
