استنبول وچ لوہے نال بنیا سوہنا تاریخی گرجا گھر۔
ایشیا تے یورپ دے ملاپ (سنگم) تے وسیا سوہنا شہر استنبول نویں دور دے نال نال سینکڑیاں سالاں دی تاریخ نوں بھی اپنے اندر سانبھی (محفوظ رکھی) بیٹھا اے۔
استنبول شہر دے وچکار مشہور آبنائے گولڈن ہارن دے کنارے اوتھے آباد بلغارین آرتھوڈوکس عیسائیاں نے اپنی عبادت گاہ نوں محفوظ بنان لئی سلطنتِ عثمانیہ دے سلطان عبدالعزیز توں درخواست کیتی۔ سلطان نے بلغاری عیسائیاں لئی ضلع بالات وچ گولڈن ہارن دے کنارے پرانے چرچ نوں اک انوکھا چرچ بنان دا فیصلہ کیتا۔
استنبول وچ سیاحتی گائیڈ یامور نے دੱਸیا کہ سلطان عبدالعزیز دے حکم تے اس مقصد لئی 1870 وچ فرمان جاری کیتا گیا تے نقشہ تیار کیتا گیا۔ اس کم لئی ویانا تے آسٹریا توں لوہے دا بندوبست کیتا گیا تے بحیرہ اسود (بلیک سی) دے رستے استنبول لیایا گیا۔
سوہنے ڈیزائن وچ تیار کیتے گئے ‘سینٹ اسٹیفن چرچ’ دے وڈے ٹکڑیاں نوں ویانا توں ترکی لیایا گیا تے استنبول دے ضلع بالات وچ گولڈن ہارن دے کنارے لوہے دے تیار کیتے گئے انہاں ٹکڑیاں نوں جوڑ کے اک انوکھے انداز نال گرجا گھر تعمیر کیتا گیا۔ چرچ دی محراب نوں سینٹ اسٹیفن چرچ فاؤنڈیشن بلغاریہ دی مدد نال برادری (کمیونٹی) ولوں دتے گئے چندے نال سونے دا پانی چڑھایا گیا۔
گرجا گھر دی سجاوٹ تے مرمت (تزئین و آرائش) توں بعد سینٹ اسٹیفن آرتھوڈوکس چرچ دی افتتاحی تقریب سال 2018 وچ ہوئی جس وچ ترک صدر رجب طیب اردگان تے بلغاریہ دے وزیراعظم بوائیکو بوریسوف نے شرکت کیتی۔ انیسویں صدی دے اس شاہکار لوہے دے گرجا گھر نوں دنیا وچ اج دے دور وچ لوہے نال تیار کیتا گیا واحد بلغارین آرتھوڈوکس چرچ ہون دا اعزاز حاصل اے۔
