ملتان: مشتبہ ایچ آئی وی مریض دا عام مریضاں نال آپریشن کیتے جان دا انکشاف

ملتان: نشتر ہسپتال وچ مشتبہ ایچ آئی وی مریض دا عام مریضاں نال آپریشن، تھیٹر سیل، 7 مریضاں تے عملے دے ٹیسٹ شروع

ملتان دے نشتر ہسپتال وچ ایچ آئی وی (HIV) دے مشتبہ مریض دا عام مریضاں دے نال آپریشن کیتے جان دا انکشاف ہویا اے جیدے توں بعد شعبہ سرجری دا آپریشن تھیٹر سیل کر دتا گیا اے۔

ایم ایس نشتر ہسپتال ڈاکٹر راؤ امجد نے جیو نیوز نال گل بات کردیاں دسیا کہ مشتبہ مریض دی رپورٹ مثبت آون تے اک دن بعد آپریشن تھیٹر سیل کیتا گیا۔ اوہناں دے مطابق منگل والے دن ایسے تھیٹر وچ مجموعی طور تے 7 آپریشن کیتے گئے سن۔ ڈاکٹر راؤ امجد دا کہنا سی کہ اصولاں دے مطابق ہر مریض دا آپریشن توں پہلاں ایڈز ٹیسٹ لازمی قرار دتا گیا اے، پر مشتبہ مریض دی رپورٹ آون توں پہلاں ہی اوہدا آپریشن کر دتا گیا تے اگلے دن رپورٹ مثبت آ گئی۔

اوہناں دسیا کہ دو دناں تیکر ڈیوٹی دین والے 10 توں ودھ ڈاکٹرز تے پیرا میڈیکل اسٹاف دے وی ایچ آئی وی ٹیسٹ کروائے گئے نیں، جدکہ واقعے دی پڑتال لئی ایڈیشنل ایم ایس ڈاکٹر لبنیٰ دی اگوائی وچ انکوائری کمیٹی بنا دتی گئی اے۔