ٹیکنالوجی دی دنیا وچ انقلاب: چین وچ دنیا دے پہلے سمندر تھلے ڈیٹا سینٹر نے کم شروع کر دتا
چین وچ سمندر تھلے بنائے جان والے اک انوکھے ڈیٹا سینٹر نے کمرشل کم شروع کر دتا اے، جیدے سرور موڈیولز سمندر دے اندر کم کر رہے نیں۔ ایس پراجیکٹ وچ آف شور ونڈ جنریشن (ہوا توں بجلی بنان دا نظام) نوں بھی شامل کیتا گیا اے تاں جے سمندر تھلے کمپیوٹنگ انفراسٹرکچر لئی بجلی دی لوڑ نوں ہور گھٹ کیتا جا سکے۔
ایس نوں دنیا دا پہلا زیرِ آب ڈیٹا سینٹر آکھیا گیا اے جیہڑا شنگھائی دے نیڑے ‘لیانگانگ اسپیشل ایریا’ وچ بنایا گیا اے تے ایدے اندر 2 ہزار سرورز موجود نیں۔ اے ڈیٹا سینٹر سمندر دی پدھر توں لگ بھگ 35 میٹر ڈونگھائی (گہرائی) وچ موجود اے۔ چینی حکام تے اک نجی کمپنی ‘ہائی کلاؤڈ ٹیکنالوجی’ نے رل کے 22 کروڑ 60 لاکھ ڈالرز دی وڈی لاگت نال اے ڈیٹا سینٹر تیار کیتا اے۔ ایدے وچ موجود سرورز آرٹی فیشل انٹیلی جنس (AI)، 5G سروسز تے دوجے آپریشنز نوں سنبھالن دی پوری صلاحیت رکھدے نیں۔
عام ڈیٹا سینٹرز دے الٹ ایس ڈیٹا سینٹر نوں ٹھنڈا رکھن لئی سمندر دے پانی نوں ورتیا جائے گا، جیدے توں بجلی دی کھپت وچ وڈی کمی آئے گی۔ یاد رہے کہ زمین تے بنے عام ڈیٹا سینٹر چلن ویلے بہت زیادہ گرمی چھڈدے نیں، جیدی وجہ توں اوہناں نوں ٹھنڈا رکھن لئی وڈے کولنگ سسٹمز تے بہت زیادہ بجلی دی لوڑ ہوندی اے۔ اج دے دور وچ جپھے اے آئی، کلاؤڈ کمپیوٹنگ، ویب سائٹس تے ایپس دا ورتوں ودھ رہا اے، اوتھے اے ٹیکنالوجی اک وڈا انقلاب ثابت ہووے گی۔
