طبی دنیا وچ وڈی کامیابی سائنسداناں دا کمال وکھالا، اُون نال ہڈیاں دا علاج ممکن کر دتا
کنگز کالج لندن دے سائنسداناں دا کمال: اُون دا پروٹین ‘کیراٹن’ ہڈیاں نوں دوبارہ اگاون وچ مددگار، دنداں دے علاج لئی وی کم آئے گا
کنگز کالج لندن دے سائنسداناں نے طب دی دنیا وچ اک وڈی کامیابی حاصل کردیاں ہویاں لبھیا اے کہ اُون توں ملن والا پروٹین ‘کیراٹن’ ہڈیاں دے ٹشو نوں دوبارہ ودھان (نشوونما) وچ بہت فہدا مند ہو سکدا اے تے آون والے ویلے وچ ہڈیاں دے قدرتی پروٹین دی جگہ ورتیا جا سکے گا۔
تحقیقی رپورٹ دے مطابق سائنس داناں نے اُون توں نکلے کیراٹن نوں جانوراں تے ٹیسٹ کیتا، جتھے اے سُکیاں تے خراب ہڈیاں نوں ٹھیک کرن وچ مددگار ثابت ہویا۔ اے مادہ ری جنریٹیو میڈیسن تے دنداں دے علاج لئی اک تگڑا تے اثر دار متبادل بن سکدا اے۔ کھوج وچ اے وی سامنے آیا کہ ایس طریقے نال بنن والے ہڈیاں دے ٹشو پرانے علاجاں دے مقابلے وچ زیادہ تندرست تے اصلی ہڈیاں ورگے سن۔
ڈاکٹر شیرف ایلشاروے نے آکھیا کہ اے پہلی واری ثابت ہویا اے کہ اُون توں بنے مادے نوں جیندے جانوراں وچ ہڈیاں دے علاج لئی کامیابی نال ورتیا جا سکدا اے۔ اے ریسرچ اک وڈا میل دا پتھر اے جیہڑی کیراٹن نوں مستقبل دے بائیومیٹیریل لئی پیش کردی اے۔ سائنس داناں نے دھرتی تے ماحول دے فائدیاں بارے وی دسیا کہ اُون اک قدرتی چیز اے جیہنوں اکثر فارمنگ انڈسٹری وچ ضائع کر دتا جاندا اے، پر ہن ایہدا طبی استعمال وڈے پدھر تے کیتا جا سکے گا۔
تحقیق دے دوان ماہرین نے کیراٹن توں خاص جھلیاں (میمبرینز) تیار کیتیاں جیہناں نوں کیمیائی طریقے نال مضبوط تے پائیدار بنایا گیا۔ بعد وچ جدوں ایہناں کیراٹن جھلیاں نوں لیبارٹری وچ انساناں دیاں ہڈیاں دے خلیات (cells) تے آزمایا گیا، تاں خلیات نے کامیابی نال اپنی گنتی ودھائی تے تندرست ہڈیاں بنن دے پکے نشان سامنے آئے۔
