“جنوبی کوریا وچ وی چلی سجل علی دی لہر، کورین مداحاں نے دتے وکھ وکھ ناں”
پاکستانی شوبز انڈسٹری دی جانی مانی اداکارہ سجل علی دے چاہون والے (مداح) جنوبی کوریا وچ وی موجود نیں.
سجل علی دے کورین مداحاں نے اوہناں نوں سوہنے سوہنے ناں وی دتے ہوئے نیں، اوہ اوہناں نوں پیار نال “سجل اونی” (Sajal unnie) تے “یون دن” (Yoon-din) اکھدے نیں.
اداکارہ جنوبی کوریا وچ سوشل میڈیا تے اودوں وڈی توجہ دا مرکز بنیاں جدیوں حال ہی وچ اوہناں دے اک کورین مداح نوں اوہناں دی شادی بارے پتہ چلیا. سجل علی دے ایس کورین مداح نے سوشل میڈیا ویب سائٹ ایکس (ٹویٹر) تے اپنی پوسٹ وچ حیرانی دا اظہار کردیاں لکھیا، “کیہ سجل علی شادی شدہ سی؟ ایہ جان کے تے مینوں انج لگیا جیویں میری دنیا ہی تباہ ہو گئی اے.” اداکارہ دی شادی بارے جان کے اوہناں دے کورین مداح دے ایس ردِعمل تے دوجے مداحاں نے وی وکھو وکھرے تبصرے کرنا شروع کر دتے.
بہتے (زیادہ تر) کورین مداح سجل علی دی شادی بارے جان کے حیران ہوندے نظر آئے.
دوجے پاسے، سوشل میڈیا ورتن والے ایس معاملے تے اداکارہ دے کورین مداحاں دی اداسی دیکھ کے حیران نظر آئے. اک صارف نے حیرانی نال لکھیا، “کیہ کوریا وچ وی سجل علی دے چاہون والے نیں؟”، اک دوجے صارف نے لکھیا، “انٹرنیٹ پاروں تساں نوں ہر تھاں تے کسے نہ کسے دا مداح مل ہی جائے گا.”
اک ہور صارف نے لکھیا، “ایہی وجہ اے کہ میں انٹرنیٹ نال پیار کردا واں، کیونکہ ایس پاروں ہر کوئی اک دوجے نال جڑیا ہویا اے، سانوں ایس توں پہلاں کدی انج دا کجھ دیکھن نوں نہیں ملیا.”
چیتے رہے (واضح رہے) کہ سجل علی نے اپنے ساتھی اداکار احد رضا میر نال شادی کیتی سی جیہڑی زیادہ چِر نہیں چل سکی تے دوواں وچکار 2022ء وچ طلاق ہو گئی سی.
ہن کجھ چِر توں سجل علی تے حمزہ سہیل دے نیڑے دے تعلقات تے اوہناں دی ممکنہ شادی بارے سوشل میڈیا تے افواہاں چل رہیاں نیں.
