کراچی وچ عیدالاضحیٰ دے موقعے تے قصائیاں دی ریٹ لسٹ جاری
کراچی وچ عیدالاضحیٰ لئی قصائیاں دی ریٹ لسٹ جاری، پہلے دن دے ریٹ سب توں تگڑے
کراچی وچ عیدالاضحیٰ (بکرا عید) دے موقعے تے قصائیاں دی ریٹ لسٹ جاری کر دتی گئی اے۔
ایکسپریس نیوز مطابق، ایمپریس مارکیٹ میٹ مرچنٹس ایسوسی ایشن نے دسیا اے کہ عید دے پہلے دن بچھیا (گاں) دی کٹائی دا ریٹ 18 توں 20 ہزار روپے رکھیا گیا اے، جدکہ بکرا ذبح کرن دا ریٹ 4 ہزار روپے مقرر کیتا گیا اے۔ اونٹھ دی کٹائی لئی پہلے دن 40 توں 50 ہزار روپے تیکر لائے جاون گے۔
دوجے تے تیجے دن کمی:
ایسوسی ایشن مطابق، عید دے دوجے تے تیجے دن کٹائی دے ریٹس وچ تقریبن 30 فیصد تیکر کمی ویکھن وچ آوے گی۔
مارکیٹ دے دوجے ریٹ:
ہور خبراں مطابق، مارکیٹ وچ 2 توں ڈھائی من وزنی وڈے جانور دی کٹائی دا ریٹ 14 ہزار توں 18 ہزار روپے تیکر لیا جا رہا اے، جدکہ تقریبن 20 کلو وزن دے بکرے دی کٹائی لئی 5 توں 10 ہزار روپے تیکر وی منگے جا رہے نیں۔
ذرائع دا کہنا اے کہ عید دے دناں وچ قصائیاں دی منگ (ڈیمانڈ) ودھن، پہلے توں بکنگ کروان پاروں تے ویلے دی گھاٹ (کمی) وجہوں ریٹاں وچ واضح فرق ویکھیا جاندا اے، جدکہ کج علاقیاں وچ صفائی تے سانبھے (محفوظ) طریقے نال ذبح کرن لئی وادھو (اضافی) پیسے وی لئے جاندے نیں۔
