گوگل دی جانب توں کروڑاں مچھروں نوں کھلی فضا وچ چھڈن دا منصوبہ کیوں بنایا گیا ہے؟
گوگل نوں سرچ انجن، ای میل تے میپس سمیت کئی انٹرنیٹ نیناں (خدمات) لئی جانیا جاندا اے، پر ایہ کمپنی ہن ‘بھینڑے (برے) کیڑیاں نوں چنگے کیڑیاں نال ڈکنا (روکنا)’ چاہندی اے تے اسیں ایتھے کوڈنگ دی گل نہیں کر رہے۔
جی ہاں سچی مچی، ایہ ٹیکنالوجی کمپنی جراثیماں توں پاک کروڑاں مچھروں نوں کھلی ہوا وچ چھڈن دی سدھر (خواہشمند) اے۔ گوگل ولوں امریکی حکومت اگے ارداس (درخواست) کیتی گئی اے کہ اوہنوں ریاست کیلیفورنیا تے فلوریڈا وچ 3 کروڑ 20 لاکھ مچھر چھڈن دی اجازت دتی جائے۔
کمپنی دے ‘ڈی بگ پروگرام’ دے تھلے گوگل ولوں ٹیکنالوجی راہیں جراثیماں توں پاک ‘نر مچھروں’ دی فوج پالی گئی اے تاں جے ایہناں کیڑیاں توں پھیلن والیاں بیماریاں دے وادھے نوں گھٹ کیتا جا سکے۔ مچھروں نوں دنیا دا سبھ توں خوفناک جاندار منیا جاندا اے جیہدے پھیلائے روگاں (امراض) پاروں دنیا بھر وچ ہر ورھے ڈینگی، زیکا، ملیریا تے ہور بیماریاں نال لکھاں موتاں ہوندیاں نیں۔
یو ایس انوائرمنٹل پروٹیکیشن ایجنسی (ای پی اے) ولوں جاری کیتے گئے نوٹس وچ دَسیا گیا اے کہ ایہ ادارہ گوگل ولوں 2 سالاں دے اک پروگرام دی درخواست تے وچار کر رہا اے۔ ایس پروگرام دے تحت کیلیفورنیا تے فلوریڈا وچ ہر سال ایک کروڑ 60 لاکھ مچھروں نوں چھڈیا جائے گا۔ ای پی اے ولوں گوگل دی ایس درخواست دی منظوری دا فیصلہ کیتا جائے گا۔ چیتے رہے کہ ‘نر مچھر’ انساناں دا لہو (خون) نہیں چوستے تے نہ ہی بیماریاں پھیلاؤندے نیں، ایس پروگرام دا اصل مقصد ایہناں کیڑیاں دی گنتی (آبادی) نوں ودھن توں روکنا اے۔
ویں جے سنن وچ ایہ عجیب لگدا اے کہ ایک وڈی ٹیکنالوجی کمپنی ایس طرحاں دے پروگرام تے کم کرے، پر گوگل دی سرپرست کمپنی ‘الفابیٹ’ ورھیاں توں صحت بارے پروگراماں تے کم کر رہی اے۔ الفابیٹ دی اک ذیلی کمپنی ‘ویرلی’ نے 2026 دے شروع وچ عالمی پدھر تے بیماریاں دے خلاف جنگ تے طبی مسئلیاں نوں ٹھل پاؤن لئی ‘مون شاٹ پراجیکٹ’ شروع کیتا سی۔
گوگل دا ‘ڈی بگ پراجیکٹ’ 2016 توں کم کر رہا اے جیہدا مقصد ٹیکنالوجی دی مدد نال مچھروں توں پھیلن والیاں بیماریاں نوں روکنا اے۔ گوگل دے مطابق مچھروں دے خلاف ہن تک دوجے طریقے زیادہ اثر دار ثابت نہیں ہوئے، جدکہ کیڑے مار دوائیاں دا استعمال وی ویلے دے نال بے اثر ہو جاندا اے۔ ہالے گوگل ولوں مچھروں دی اک خاص قسم ‘Aedes aegypti’ بارے مڈھلے پروگرام تے دھیان دتا جا رہا اے۔ مچھروں دی ایہ قسم ڈینگی، زیکا، پیلا بخار (زرد بخار) تے چکن گنیا دے بوہتے کیسز پھیلان وچ حصہ پاؤندی اے۔ ایس توں پہلاں گوگل ولوں کچھ چِر پہلے سنگاپور وچ ‘نر مچھروں’ نوں چھڈیا گیا سی، جیہدے توں بعد اوتھے ایہناں مچھروں دی آبادی وچ 80 توں 90 فیصد تیکر کمی آئی سی۔
