5 سال دی کڑی نال زیادتی تے قتل کرن والے مجرم دی اپیل خارج پھانسی دا فیصلہ برقرار
سپریم کورٹ نے پنج (5) سال دی معصوم بچی نال زیادتی تے قتل کرن والے مجرم دی پھانسی (سزائے موت) دے خلاف اپیل نوں خارج کردے ہوئے پھانسی دا فیصلہ برقرار رکھیا اے۔
سپریم کورٹ نے اپنے فیصلے وچ آکھیا اے کہ اپنی مرضی نال نشہ کر کے جرم کرن والا سزا وچ کسے چھوٹ (رعایت) دا حقدار نہیں ہوسی، جرم توں بچن (استثنیٰ) دا دعویٰ اودوں ای کیتا جا سکدا اے جڈوں مرضی دے خلاف دھکے نال نشہ دتا گیا ہووے۔ مجرم دے خلاف زیادتی تے قتل دا پرچہ (مقدمہ) 22 جنوری 2014 نوں سبی وچ درج ہویا سی، ٹرائل کورٹ نے پھانسی دی سزا سنائی سی جیہنوں ہائیکورٹ تے ہن سپریم کورٹ نے وی برقرار رکھیا اے۔ صفائی دے وکیل نے نشے دی حالت وچ ہون دا بہانہ بنا کے پھانسی نوں عمر قید وچ بدلن لئی دلیلاں دتیاں سن۔
سپریم کورٹ دے مطابق مجرم نے وڈے ہی ظلم (بے دردی) نال بچی نوں موت دے گھاٹ اتاریا، قانون بالکل صاف (واضح) اے کہ کسے بندے نوں اوس عمل دی سزا نہیں دتی جا سکدی جیہدا اوہدا ارادہ نہ ہووے، پر اپنی مرضی نال نشہ کر کے اوہنوں اپنے بچاؤ (دفاع) لئی استعمال نہیں کیتا جا سکدا۔ مجرم نے خود منیا (تسلیم کیا) اے کہ اوہنے اپنی مرضی نال شراب پیتی سی، تے اپنی مرضی نال شراب پین والا ایہ حق نہیں رکھدا کہ اوہ مجرمانہ ذمہ داری توں معافی منگے، ایس لئی اپیل خارج کردے ہوئے سزائے موت برقرار رکھی جاندی اے۔ تن رکنی بینچ وچ جسٹس صلاح الدین پہنور تے جسٹس اشتیاق ابراہیم وی شامل سن۔
