آؤندے مالی سال لئی گھٹ توں گھٹ ماہانہ اجرت 45 ہزار مقرر کرن دی سفارش
اسلام آباد: پاکستان انسٹی ٹیوٹ آف ڈیولپمنٹ اکنامکس (PIDE) نے آؤندے مالی سال لئی گھٹ توں گھٹ ماہانہ اجرت (تخواہ) 45 ہزار روپے مقرر کرن دی سفارش کر دتی اے۔
ایس حوالے نال پائیڈ نے ثبوتاں تے مبنی فریم ورک تجویز کیتا اے جس دے تحت مالی سال 2026-27 لئی قومی پدھر (سطح) تے گھٹ توں گھٹ اجرت 45000 روپے ماہانہ مقرر کرن دی سفارش کیتی گئی اے۔ پائیڈ نے موجودہ گھٹ توں گھٹ اجرت 40000 روپے دے مقابلے وچ آؤندے مالی سال لئی 12.5 فیصد وادھا تجویز کیتا اے۔
پائیڈ دی رپورٹ دے مطابق گھٹ توں گھٹ اجرت دی پالیسی ہن صرف لیبر ڈیپارٹمنٹ تکر محدود معاملہ نہیں رہ گئی، بلکہ اے گھریلو خریدن دی طاقت، غربت دے خدشیاں، غیر رسمی روزگار، مقامی منگ، پیداواری ترغیبات تے مجموعی سماجی استحکام تے سدھا اثر پاندی اے۔
رپورٹ وچ دسیا گیا اے کہ مالی سال 2026 دے جولائی توں اپریل دے عرصے وچ اوسط مہنگائی (افراطِ زر) 6.19 فیصد رہی تے اپریل 2026 وچ سالانہ مہنگائی 10.9 فیصد تکر اپڑ (پہنچ) گئی اے۔
