امپائر نوں آپ اندازہ اے کہ اوہناں نے ایس حکومت نوں لیا کے غلطی کیتی: سراج الحق

امیر جماعت اسلامی سینیٹر سراج الحق نے وفاقی حکومت دی کارکردگی نوں اک وار فیر تنقید دا نشانہ بناندیاں آکھیا اے امپائر نوں آپ اندازہ اے کہ اوہناں نے ایس حکومت نوں لیا کے غلطی کیتی۔ لہور وچ پریس کانفرنس کردیاں سراج الحق دا کہنا سی عالمی مالیاتی فنڈ (آئی ایم ایف) دی شرطاں تے وفاقی بجٹ پیش کیتا گیا جہدے تے عدم اعتماد دا اظہار کرنے آں۔ امیر جماعت اسلامی آکھیا ساڈھے تن مہینے وچ کورونا دے حوالے نال سرکار دی کوئی پالیسی نظر نہیں آئی۔ سرکار اپنے بیانات توں کنفیوژن پھیلا رہی اے۔ اوہناں آکھیا لاک ڈاؤن دے دوران ہر دیس نے تیاری کیتی پر ساڈی سرکار سُتی رہی، کسے ہسپتال وچ اک وی نواں وینٹی لیٹر نہیں دتا گیا، ایتھوں تک کہ دیس دے وڈے شہراں وچ کورونا دے مریضاں لئی بیڈ تک دستیاب نہیں۔ سراج الحق نے برہمی نال آکھیا لہور دے عوام باشعور نیں جہڑا عوام نوں جاہل کہندے نیں اوہ آپ جاہل نیں، اصل وچ ایہ اوہناں نوں جاہل کہہ رہے نیں جہناں نے ایہناں نوں ووٹ دتا۔ اوہناں ہور آکھیا امپائر نوں آپ وی اندازہ ہووے گا کہ اوہناں نے ایس سرکار نوں لیا کے غلطی کیتی اے۔