“قومی اقتصادی کونسل نے سالانہ ترقیاتی پروگرام تے اہم معاشی اہداف دی منظوری دے دتی”
“وزیراعظم شہباز شریف دی صدارت ہیٹھ قومی اقتصادی کونسل دا اجلاس ہویا، کونسل نے اہم معاشی اہداف دی منظوری دے دتی، کونسل نے آؤندے مالی سال لئی سالانہ ترقیاتی پروگرام دی منظوری وی دے دتی اے۔”
اجلاس وچ سندھ، کے پی کے تے بلوچستان دے وزراء اعلیٰ نے شرکت کیتی، اجلاس وچ پنجاب دی نمائندگی سینئر وزیر مریم اورنگزیب نے کیتی۔
وزیراعظم شہباز شریف نے قومی اقتصادی کونسل دے اجلاس وچ گل بات کردیاں کہیا کہ بجٹ دے حوالے نال صوبیاں نال کئی ہفتیاں توں مشاورت جاری اے، صوبیاں نال ہور وسائل پیدا کرن دے حوالے نال مشاورت ہوئی، زیادہ توں زیادہ وسائل پیدا کرنا ساڈی ترجیح اے، دہشتگردی دے چیلنج نال نمٹن لئی وسائل دی لوڑ اے، دفاع لئی وسائل دی فراہمی ساڈی ترجیح اے۔
وزیراعظم نے کہیا کہ ملکی معیشت نوں وڈے چیلنجز دا سامنا کرنا پیا، ٹیم ورک دے طور تے پاکستان دے بہترین مفاد وچ فیصلے کیتے، خطے دی صورتحال پاروں تیل دیاں قیمتاں اسمان نال گلاں کرن لگیاں نیں، صوبیاں نے ایس حوالے نال بھرپور تعاون کیتا، اج میکرو پدھر (سطح) تے ملکی معیشت مستحکم اے۔
وزیراعظم نے روزگار دے موقعے، برآمدات، معاشی بہتری تے پیداواری صلاحیت ودھاؤن نوں سبھ دی سانجھی ذمہ داری قرار دتا تے کہیا کہ مشکلاں دے باوجود کوشش کیتی کہ آئی ایم ایف پروگرام تے عمل پیرا رہیے۔
وزیراعظم دا کہنا سی کہ تیل دیاں قیمتاں دی مد وچ عوام نوں 128 ارب روپے دا ریلیف دتا، دنیا دے کئی ملکاں وچ پیٹرول پمپاں تے لائناں ویکھن وچ آئیاں، بروقت اقدامات پاروں پاکستان وچ عوام نوں پیٹرول لبھدا رہیا، اسیں عوام دی توقعات تے پورا اترن دی کوشش کیتی، ایہہ سبھ ٹیم ورک دے نتیجے وچ ممکن ہویا۔
وفاقی وزیر منصوبہ بندی احسن اقبال نے کہیا کہ قومی اقتصادی کونسل نے پی ایس ڈی پی دی منظوری دے دتی اے، آؤندے مالی سال لئی پی ایس ڈی پی دا حجم 1000 ارب روپے رکھیا گیا اے۔
چالو (رواں) مالی سال وی حکومت زیادہ تر معاشی اہداف حاصل کرن وچ ناکام رہی: ذرائع
ذرائع دے مطابق چالو مالی سال دا قومی اقتصادی سروے کل دن 2 بجے توں بعد جاری کیتا جائے گا، 2025-26 دے دوران حکومتی معاشی کارکردگی دا اسکور کارڈ جاری ہووے گا۔
ذرائع نے دسیا کہ چالو مالی سال وی حکومت زیادہ تر معاشی اہداف حاصل کرن وچ ناکام رہی، جی ڈی پی گروتھ 4.2 فیصد ہدف دے مقابلے وچ 3.7 فیصد تک محدود رہن دا اندازہ اے، آئی ایم ایف، عالمی بینک تے اے ڈی بی نوں بھی پاکستان دی جی ڈی پی گروتھ گھٹ رہن دی توقع اے۔
ذرائع دے مطابق چالو مالی سال دے دوران فی کس آمدن دا سالانہ ہدف پورا نہ ہو سکیا، دستاویز دے مطابق چالو مالی سال فی کس آمدنی دا ہدف 5 لاکھ 60 ہزار 803 روپے سی، چالو سال فی کس آمدن 5 لاکھ 33 ہزار 629 روپے تک محدود رہن دا امکان اے، ڈالر وچ فی کس آمدن 150 ڈالر اضافے نال 1901 ڈالر ریکارڈ ہوئی۔
دستاویز دے مطابق ایس سال وی زراعت تے صنعتی شعبے دی ترقی دا ہدف پورا نہ ہو سکیا، زرعی شعبے دی عارضی (عبوری) کارکردگی 4.5 فیصد ہدف دے مقابلے وچ 2.89 فیصد رہی، صنعتی شعبے دی گروتھ 4.30 فیصد ہدف دے مقابلے وچ 3.51 فیصد تک محدود اے، خدمات دے شعبے دی ترقی 4 فیصد ہدف دے مقابلے وچ 4.09 فیصد تک ہون دا امکان اے۔
اوسط مہنگائی 7.50 فیصد ہدف دے مقابلے وچ 11 مہینیاں وچ 7 فیصد تے مئی وچ 11.66 فیصد رہی۔
