ایران جنگ نہیں چاہندا پر خودمختاری تے قومی وقار تے کسے وی قسم دا سمجھوتہ وی قبول نہیں کرے گا: ایرانی صدر
ایرانی صدر مسعود پزشکیان نے کہیا اے کہ جنگ ایران دے مفاد وچ نہیں اے پر دھمکیاں نال جھکن تے مجبور نہیں کیتا جا سکدا، دشمن دا ایہ خواب اے کہ ایران بیرونی جارحیت دے سامنے جھک جائے گا۔
تہران وچ آیت اللہ خمینی دی برسی دی تقریب نال خطاب کردیاں ایرانی صدر مسعود پزشکیان دا کہنا سی کہ ایران جنگ نہیں چاہندا، طویل جنگ ایران دے مفاد وچ نہیں، پر جے ملک تے حملہ کیتا گیا تے ایران کدی ہتھیار نہیں سٹے گا، ایران خودمختاری تے قومی وقار تے کسے قسم دا سمجھوتہ وی قبول نہیں کرے گا، سانوں ایس غیریقینی صورتحال چوں نکلنا ہووے گا جتھے نہ مکمل جنگ اے تے نہ ہی پائیدار امن، حکومت قومی خودمختاری نوں برقرار رکھدیاں سفارتی تعطل نوں ختم کرن لئی پرعزم اے۔
ایرانی صدر مسعود پزشکیان دا کہنا سی کہ جے اوہ جارحیت دا راہ اختیار کردے نیں تے اسیں ہرگز پچھے نہیں ہٹاں گے، اوہ ایس خواہش نوں صرف اک خواب ہی سمجھن، سانوں اپنے اندرونی اتحاد تے قومی یکجہتی نوں محفوظ رکھنا ہووے گا، دشمن ایس امید وچ اے کہ اوہ ساڈے درمیان ونڈ (تقسیم) پیدا کر کے اپنے مقاصد حاصل کر لوے گا۔
مسعود پزشکیان دا کہنا سی کہ خطے دے عرب ملکاں نوں ایران دے خلاف متحد کرن دا دشمن دا منصوبہ وی ناکام ثابت ہویا، ایرانی قیادت دی دانشمندانہ سفارت کاری پاروں ایہ حکمت عملی ناکام ہو گئی۔
انہاں دا کہنا سی کہ کسے ملک نوں جہازاں تے بمباری دے ذریعے سرینڈر (ہتھیار سٹن) تے مجبور نہیں کیتا جا سکدا، اوہ غزہ نوں تن سال بعد وی سرینڈر کرن تے مجبور نہیں کر سکے، اوہ ایران نوں مجبور کر کے سرینڈر کرن دی توقع انج کداں کر سکدے نیں، ایران یقینی طور تے ایسا ملک نہیں جو جھک جائے۔
ایرانی صدر دا ہور کہنا سی کہ شہید سپریم لیڈر آیت اللہ خامنہ ای نے حکومت نوں مذاکرات اگے ودھاؤن دی واضح اجازت دتی سی تے ہدایت دتی سی کہ ‘جاؤ تے ایس مسئلے نوں حل کرو۔’
