تاریخی حجاز ریلوے دی بحالی وچ اہم پیشرفت، سعودیہ تے ترکیے وچکار مفاہمتی یادداشتاں تے دستخط
سعودی عرب تے ترکیے نے ریلوے دے شعبے وچ تعاون لئی مفاہمتی یادداشتاں تے دستخط کیتے نیں، جس نوں تاریخی حجاز ریلوے دی بحالی ول اک اہم پیشرفت قرار دتا جا رہا اے۔
سعودی میڈیا دے مطابق ریاض وچ سعودی وزیر ٹرانسپورٹ صالح الجاسر تے ترکیے دے وزیر ٹرانسپورٹ و انفراسٹرکچر عبدالقادر اوغلو نے ریلوے تے لاجسٹکس دے شعبیاں وچ تعاون لئی مفاہمتی یادداشتاں تے دستخط کیتے۔
سعودی میڈیا دا کہنا اے کہ ایہ مفاہمتی یادداشتاں اک وڈے علاقائی منصوبے دا حصہ نیں، جس دا مقصد ترکیے، شام تے اردن دے ذریعے خلیجی ملکاں نوں یورپ نال جوڑن والی زمینی تجارتی راہداری قائم کرنا اے۔
سعودی میڈیا دے مطابق ایہ قدم ترکیے، شام تے اردن دی وزارت ٹرانسپورٹ وچکار حالیہ رابطیاں توں بعد سامنے آیا اے، جنہاں وچ آؤن والے چار توں پنج سالاں دوران سرحد پار نقل و حمل دے بنیادی ڈھانچے دی بحالی لئی اک سانجھے روڈ میپ تے اتفاق کیتا گیا سی۔ ترکیے پہلے ہی شام دی سرحد دے نیڑے واقع اوہناں ریلوے لائنوں دی بحالی دا کم شروع کر چکا اے جہڑیاں تقریباً 15 سالاں توں بند سن۔
منصوبے دے مطابق ایہ راہداری ترکیے دے ریلوے نیٹ ورک نوں جنوبی یورپ نال جوڑے گی، فیر شام دے شہراں حلب تے دمشق توں لنگھدیاں ہویاں اردن دے دارالحکومت عمان تے بحیرہ احمر تے واقع بندرگاہ عقبہ تیکر اپڑے گی۔ ایس راستے دا مقصد خلیجی خطے تے یورپ وچکار مسافراں تے سامان دی نقل و حمل لئی اک تیز، گھٹ خرچے والا تے زیادہ فائدہ مند متبادل راستہ فراہم کرنا اے۔
حجاز ریلوے دی بحالی دا منصوبہ
رواں مہینے دے شروع وچ عبدالقادر اوغلو نے تاریخی حجاز ریلوے نوں جدید بنان تے مستقبل وچ ایہنوں سلطنتِ عمان تیکر وڈھان (توسیع دین) دے منصوبے دا وی اعلان کیتا سی۔ ایس منصوبے دا مقصد اک ایسا متبادل تجارتی راستہ قائم کرنا اے جہڑا آبنائے ہرمز دے ذریعے سمندری نقل و حمل تے انحصار گھٹ کر سکے۔
سعودی عرب دے تاریخی شہر العُلا دے بحال شدہ ریلوے اسٹیشن تے حجاز ریلوے دا اک تاریخی انجن نمائش لئی رکھیا گیا اے، فوٹو: ترک میڈیا/ اے ایف پی
ترک وزیر ٹرانسپورٹ دا کہنا سی کہ ایس منصوبے دا ہدف ریلوے لائن نوں سلطنت عمان تیکر وڈھانا اے تاکہ بحر ہند تیکر رسائی حاصل کیتی جا سکے، جہڑی آبنائے ہرمز دا اک اسٹریٹجک متبادل ثابت ہوئے گی۔
حجاز ریلوے نوں سلطنتِ عثمانیہ دے آخری بااختیار خلیفہ سلطان عبدالحمید ثانی دے دورِ حکومت وچ 1900ء توں 1908ء دے وچکار تعمیر کیتا گیا سی۔ ایہ 20 ویں صدی دے شروع وچ سلطنتِ عثمانیہ دے سب توں نمایاں بنیادی انفراسٹرکچر دے منصوبیاں وچ گنیا جاندا سی۔ ایس منصوبے نوں برطانیہ تے فرانس دی سخت مخالفت دا سامنا کرنا پیا سی کیونکہ ایہ منصوبہ اوہناں دے سامراجی ارادیاں لئی خطرہ سمجھیا جا رہا سی۔
