بھارت: شہریاں دا چوری دے الزام اُتے اک بندے اُتے تشدد، سر دے وال کٹ دتے

بھارتی پنجاب دے شہر لدھیانہ وچ شہریاں نے چوری دے الزام وچ اک بندے نوں بدترین تشدد دا نشانہ بنایا۔

بھارتی میڈیا دے مطابق شہریاں نے اک بندے نوں پھڑیا تے اوہنوں زبردستی بینک دے احاطے وچ لے گئے جِتھے اوہنوں کھمبے نال بنھ کے اوہدے گلے وچ پلے کارڈ پا دِتا جِہدے اُتے ہندی تے پنجابی زبان وچ ‘میں چور ہاں’ لکھیا ہویا سی۔

متاثرہ بندے نوں جسمانی تشدد دا نشانہ بنان دے نال نال اوہدے سر دا اک حصہ تے اکھاں دیاں بھوواں وی مونھ دتیاں گئیاں، جَد کہ اوہدی ویڈیو بنا کے سوشل میڈیا اُتے وائرل کر دتی۔

میڈیا رپورٹاں دے مطابق عینی شاہدین تے فوٹیج توں پتا چلدا اے کہ متاثرہ بندے نوں قید دی حالت وچ اعترافِ جرم کرن اُتے مجبور کیتا گیا۔

ویڈیو وائرل ہون توں بعد پولیس نے واقعے دا نوٹس لیندے ہوئے مقدمہ درج کر لیا۔