بھارت: ظالم شوہر دا 8 مہینے دی حاملہ بیوی اُتے بے رحمانہ تشدد، بچہ جمن توں پہلاں ہی فوت ہو گیا
بھارت وچ ظالم شوہر نے اپنی 8 مہینے دی حاملہ بیوی نوں بدترین تشدد دا نشانہ بنایا جِہدے توں اوہدا حمل ضائع ہو گیا۔
بھارتی میڈیا دے مطابق ایہہ واقعہ ریاست اترا کھنڈ دے علاقے وکاس نگر وچ پیش آیا۔ سیما دی 7 سال پہلاں ببلو نال شادی ہوئی سی، ایس جوڑے دیاں 2 دھیاں نیں تے سیما ہن تیجی واری حاملہ سی۔ کچھ دِناں پہلاں میاں بیوی دے وچکار جھگڑا ہویا جِہدے دوران شوہر نے غصے وچ آ کے بیوی نوں لتاں تے ڈنڈے نال بدترین تشدد دا نشانہ بنایا، جِہدے توں بچہ جمن توں پہلاں ہی فوت ہو گیا۔
بھارتی میڈیا دے مطابق ایہہ معاملہ اودوں سامنے آیا جدوں سیما دے والد شیر سنگھ اپنی دھی نوں ملن آئے پر ملزم نے اوہناں نوں گھر وڑن توں روک دِتا۔ ایس اُتے والد نے پولیس نوں اطلاع دِتی۔ پولیس نے موقعے اُتے پہنچ کے سیما نوں فوراً علاج لئی ہسپتال پہنچایا جدکہ اوہدی گھر والے نوں گرفتار کر کے مقدمہ درج کر لیا۔
سیما دے گھر والیاں نے الزام لایا کہ ببلو کچھ دِن پہلاں سیما نوں زبردستی پانی پت لے گیا سی، جہاں اوہنے غیر قانونی طور اُتے جمن توں پہلاں بچے دی جنس (کُڑیا اے یا مُنڈا) پتا کرن لئی ٹیسٹ کروائے۔ ماپیاں (والدین) نے دعویٰ کیتا کہ ملزم نے ٹیسٹ وچ کُڑی دا پتا لگن اُتے بیوی اُتے تشدد کیتا۔
دوجے پاسے پولیس نے دَسیا کہ شروعاتی جاینچ توں پتا لگا اے کہ دوواں میاں بیوی دے وچکار جھگڑا زمین دے سودے توں شروع ہویا سی۔ ملزم نے دعویٰ کیتا کہ اوہنے اپنی بیوی دے ناں اک پلاٹ خریدیا سی، جِہنوں اوہنے (بیوی نے) اپنے ماپیاں نوں پیسے دین لئی اوہنوں دَسے بغیر ویچ دِتا سی۔
