عمران فاروق قتل کیس، معظم علی، خالد شمیم تے محسن علی نوں عمر قید دی سزا

اسلام آباد: انسداد دہشت گردی دی عدالت نے عمران فاروق قتل کیس وچ نامزد ملزمان تے جرم ثابت ہون تے معظم علی، خالد شمیم تے محسن علی سید نوں عمر قید دی سزا سنا دتی۔ عدالت نے قتل دی سازش، معاونت تے سہولت کاری کیس تے فیصلہ سنایا۔ عدالت نے تناں ملزمان نوں عمران فاروق دے وارثاں نوں 10,10لکھ روپے معاوضہ ادا کرن دا حکم وی دتا۔ ایف آئی اے نے دہشت گردی دفعات دے تحت عمران فاروق قتل کیس دا مقدمہ درج کیتا سی۔ ڈاکٹر عمران فاروق نوں 16ستمبر 2010نوں برطانیہ وچ قتل کیتا گیا سی جہدے بعد ایف آئی اے نے 5دسمبر 2015نوں پاکستان وچ ایس قتل دا مقدمہ درج کیتا جہدے وچ تن ملزمان خالد شمیم، محسن علی تے معظم علی نوں گرفتار کیتا گیا جہناں تے قتل سنے قتل دی سارش تیار کرن، قتل وچ معاونت تے سہولت کاری دے الزامات لاگو کیتے گئے۔ پاکستانی حکومت ولوں برطانیہ نوں دوران ٹرائل جرم ثابت ہون دے باوجود ملزمان نوں سزائے موت نہ دین دی یقین دہانی کرائی گئی سی۔