ایہہ بجٹ ریلیف، عوامی فلاح تے تنخواہ دار طبقے تے بوجھ گھٹ کرن دا بجٹ اے، معاشی استحکام دے ثمرات عام آدمی تیکر پہنچاواں گے: وزیراعظم

وزیراعظم شہباز شریف نے آکھیا کہ اللہ تعالیٰ دے فضل و کرم تے قوم دیاں دُعاواں نال اسیں معاشی استحکام حاصل کیتا اے، تے معاشی استحکام دی بدولت اج اسیں بجٹ چ عوام نوں ریلیف دِتا اے۔

بجٹ اجلاس توں بعد وزیراعظم شہباز شریف نے اپنے بیان چ پاکستان دے ہر شہری دا اوکھے ترین حالات چ صبر و تحمل دا مظاہرہ کرن تے شکریا ادا کیتا۔

وزیراعظم نے آکھیا کہ عوام نے مشکلاں دا سامنا کیتا تے ملکی معاشی استحکام لئی بھرپور کردار نبھایا، وعدہ کیتا سی کہ معاشی استحکام مِلݨ توں بعد ایس دے ثمرات سِدھے عام آدمی تیکر پہنچاواں گے، الحمدللہ، ہݨ خوشحالی دا ویلا شروع ہو چکیا اے۔

وزیراعظم شہباز شریف نے آکھیا کہ اوکھے ویلے توں بعد جس بہتری تے ریلیف دا وعدہ کیتا سی اوہدا آغاز ہو چکیا اے، ایہہ بجٹ ریلیف دا بجٹ اے، عوامی فلاح دا بجٹ اے، ایہہ بجٹ تنخواہ دار طبقے تے بوجھ گھٹ کرن دا بجٹ اے، ایہہ برآمدات چ اضافے، زرعی ترقی، صنعتاں، سرمایہ کاری نوں ودھاوݨ تے معاشی ترقی دا بجٹ اے۔

وزیراعظم نے آکھیا کہ ایس بجٹ دا بنیادی مقصد ایہہ اے کہ معیشت دی مضبوطی دے فائدے سِدھے عوام تیکر پہنچݨ۔