پاکستان وِچ تعینات امریکی ناظم الامور وی پاکستانی کھانیاں تے مہمان نوازی دی معترف (فین)
پاکستان وِچ تعینات امریکی ناظم الامور نیٹلی بیکر نے پاکستان وِچ اپنے پسندیدہ تجربیاں نوں شیئر کردیاں ہویاں ایتھوں دی پروہنا چاری (مہمان نوازی)، کھانیاں، کرکٹ کلچر تے ویاہواں دیاں رنگ برنگیاں تقریباں نوں سراہیا (پسند کیتا) اے۔
امریکی سفارتخانے دے انسٹاگرام اکاؤنٹ اُتے شیئر کیتے گئے اک انٹرویو وِچ نیٹلی بیکر نے دَسیا کہ اوہ ویہلے ویلے (فارغ اوقات) وِچ سجنوں بیلیوں (دوستوں) نال وقت لنگھان تے پاکستان دے وکھو وکھ علاقیاں دی سیر کر کے نویاں تھاواں تے تجربیاں توں لطف اندوز ہوندیاں نے۔
اوہناں نے آکھیا کہ پاکستان آؤن توں بعد اوہناں نوں کرکٹ وِچ ڈونگھی (گہری) دلچسپی پیدا ہو گئی اے، پر اوہناں نے منیا کہ اوہ ہجے وی ایس کھیڈ دے قنوناں تے باریکیاں نوں سکھ رہیاں نے۔
جدوں اوہناں توں پچھیا گیا کہ امریکیاں نوں پاکستانی کلچر دے کہڑے پاسے (پہلو) نوں سبھ توں زیادہ سمجھنا چاہیدا اے، تاں اوہناں نے آکھیا کہ پاکستانی لوکاں دی گرمجوشی تے پروہنا چاری (مہمان نوازی) ایس لسٹ وِچ سبھ توں اُتے اے۔
نیٹلی بیکر نے پاکستانی کھانیاں بارے گل کردیاں ہویاں دَسیا کہ پالک پنیر اوہناں دے پسندیدہ کھانیاں وِچ شامل اے، جد کہ دال وی اوہناں نوں بڑی پسند اے۔ اوہناں نے ہور آکھیا کہ پاکستان وِچ چاہ تے پکوڑے وی بڑے سوادلے (مزیدار) ہوندے نے۔
پاکستانی ریوایتاں اُتے گل بات کردیاں ہویاں اوہناں نے آکھیا کہ ایتھے ویاہواں دیاں تقریباں اوہناں نوں بہت پسند نے تے اوہناں نے مہندی توں لے کے بارات تے ولیمے تیکر اِینوں تقریباں دا اک جادوئی سلسلہ آکھیا اے۔
