“حق مہر ٹبر (بیوی) دا بنیادی قانونی حق اے، گھر والے (شوہر) تے ایہدی ادائیگی لازمی اے: لاہور ہائیکورٹ”
لاہور: (محمد اشفاق) لاہور ہائیکورٹ دے جسٹس مزمل اختر شبیر نے حق مہر تارن (ادا کرنے) بارے اک وڈا فیصلہ سنواندیاں ہویاں نواں قانونی نکتہ طے کر دتا اے، عدالت نے آکھیا اے کہ حق مہر زنانی (بیوی) دا بنیادی قانونی حق اے جیہڑا بندے (شوہر) تے تارنا لازمی اے۔
عدالت نے اپنے فیصلے وچ صاف دسیا اے کہ جنی دیرو تکر حق مہر پورا نہیں دتا جاندا، زنانی نوں پورا حق اے کہ اوہ بندے توں اڈ (علیحدہ) رہ سکے، نکاح توں بعد زنانی دی روٹی کپڑا (کفالت تے نان و نفقہ) پوریاں کرنا بندے دی ذمہ داری اے۔
جسٹس مزمل اختر شبیر نے عرفان سرفراز کی آئینی درخواست تے ۱۰ صفحیاں دا لکھیا ہویا فیصلہ جاری کیتا تے نچلی عدالت دے فیصلے دے خلاف دائر اپیل نوں خارج کر دتا۔
عدالت نے آکھیا کہ کیس کرن والا نچلی عدالت دے فیصلے وچ کوئی آئینی غلطی لبھن وچ ناکام رہیا اے۔
فیصلے وچ آکھیا گیا کہ ثبوتاں نوں پرکھنا فیملی کورٹ دا کم اے تے اوہنے قانون دے مطابق اپنا کم صحیح کیتا اے، عدالت دے مطابق کیس کرن والے بندے دا کہنا سی کہ اوہنے چار کنال زرعی زمین دے بدلے چار لاکھ روپے دتے سن، پر اوہ عدالت وچ ایہدا کوئی پکا ثبوت یا رسید پیش نہ کر سکیا۔
عدالت نے ریمارکس دتے کہ کوئی وی عقل والا بندہ اے گل نہیں منے گا کہ اینی وڈی رقم بغیر کسی رسید یا پکے ثبوت دے دے دتی گئی ہووے۔
ایس توں علاوہ بندے نے دو گواہاں دا ناں تے لیا پر اوہناں نوں عدالت وچ پیش نہ کر سکیا، ریکارڈ دے مطابق اوہناں دا ویاہ (شادی) ۲۰۱۵ وچ ہویا سی، جدکہ خاتون نے ۲۰۱۶ وچ حق مہر دے طور تے پنج تولے سونا، چار کنال زرعی زمین تے پنج مرلے دے مکان دا دعویٰ کیتا سی، اپیلٹ کورٹ نے بندے نوں چار کنال زرعی زمین تے پنج تولے سونا دین دے نال نال داج (جہیز) دے ۳ لاکھ روپے دین دا وی حکم دتا سی۔
عدالت نے اے وی نوٹ کیتا کہ ۵ مرلے دے پلاٹ دی ادائیگی بارے دوواں پاسیاں دے وکلا نے تصدیق کیتی اے، ایس لئی نچلی عدالت دا اوہ فیصلہ برقرار رکھیا گیا اے۔
