ایران امریکہ سمجھوتہ: وزیرِ اعظم نے اسلام آباد سمجھوتہ پتر تے بطور ثالث دستخط کر دتے
اسلام آباد: وزیرِ اعظم شہباز شریف نے ایران تے امریکہ دے درمیان اسلام آباد مفاہمتی یادداشت تے بطور ثالث دستخط کر دتے۔
وزیرِ اعظم آفس دے اعلامیے دے مطابق اسلام آباد مفاہمتی یادداشت تے امریکی صدر ڈونلڈ ٹرمپ تے ایران دے صدر مسعود پزشکیان دے دستخط پہلے ہی موجود نیں۔ واضح رہے کہ امریکہ تے ایران نے جنگ دے خاتمے تے آبنائے ہرمز نوں کھولن بارے مفاہمتی یادداشت تے متھے ویلے توں پہلے ہی دستخط کر دتے نیں تے اے معاہدہ ہن لاگو ہو چکا اے۔ امریکی صدر ڈونلڈ ٹرمپ نے ایران امریکہ مفاہمتی یادداشت تے فرانسیسی صدر ایمانوئل میکرون دی موجودگی وچ دستخط کیتے۔ دوجے پاسے ایرانی سرکاری میڈیا ولوں صدر مسعود پزشکیان دیاں تصویراں جاری کیتیاں گئیاں نیں، جنہاں وچ اوہناں نوں مفاہمتی یادداشت تے دستخط کردے ہوئے دکھایا گیا اے۔ ایس توں پہلے سماجی رابطے دی ویب سائٹ ایکس (ٹویٹر) تے وزیراعظم شہباز شریف نے امریکہ تے ایران دے درمیان مفاہمت دی یادداشت تے دستخط دی تصدیق کیتی سی، اوہناں نے آکھیا سی کہ اسلام آباد ایم او یو فوری طور تے لاگو ہوئے گا، ایران آبنائے ہرمز دوبارہ کھولے گا تے امریکہ بحری ناکہ بندی ختم کرے گا۔ شہباز شریف نے آکھیا کہ بطور ثالث میں وی ایس معاہدے دی توثیق کیتی اے، تکنیکی پدھر دے مذاکرات دا آغاز 19 جون توں ہوئے گا۔ وزیراعظم نے ایرانی سپریم لیڈر مجتبیٰ خامنہ ای تے صدر پزشکیان دی قیادت نوں خراج تحسین پیش کردے ہوئے آکھیا کہ اسلام آباد معاہدہ خطے وچ سانجھی خوشحالی دی بنیاد بنے گا۔ شہباز شریف نے امریکی صدر ڈونلڈ ٹرمپ نوں ٹویٹ وچ مبارکباد دیندے ہوئے آکھیا کہ امریکی صدر ٹرمپ دی سفارتکاری نے ممکنہ وڈے ٹاکرے نوں روکیا، وزیراعظم نے امریکی مذاکراتی ٹیم دیاں خدمات نوں خراج تحسین پیش کیتا۔ اوہناں نے مزید آکھیا کہ فیلڈ مارشل سید عاصم منیر دی انتھک محنت، بے لوث خدمات تے فیصلہ کن کردار نال تریخی پیشرفت ہوئی۔
