جماعت اسلامی نے کل پورے پاکستان وچ احتجاج دی کال دے دتی
لاہور: حافظ نعیم نے آکھیا اے کہ پٹرولیم مصنوعات دیاں قیمتاں 28 فروری والی پدھر اُتے لیاؤن لئی پورے پاکستان وچ احتجاج دی کال دتی اے۔
امیر جماعت اسلامی حافظ نعیم الرحمان نے آکھیا اے کہ پاک سعودی عرب معاہدے وچ ایران تے ترکیے نوں وی شامل کیتا جاوے۔
حافظ نعیم الرحمان نے پریس کانفرنس کردیاں آکھیا کہ عالمی مارکیٹ وچ پٹرولیم مصنوعات دیاں قیمتاں ڈگ گئیاں نیں، پاکستان وچ پٹرول دی قیمت 225 روپے اُتے فکس ہونی چاہیدی اے، ساڈا مطالبہ اے پٹرول دی قیمت 225 روپے فی لیٹر اُتے فکس کیتی جاوے۔
اوہناں نے آکھیا کہ بجلی تے گیس دیاں قیمتاں اُتے وی حکومت اپنا کیتا وعدہ پورا کرے، ہن آئی پی پیز معاہدے وی ختم ہون جا رہے نیں، آئی ایم ایف حکمراناں نوں وی اپنے اخراجات گھٹ کرن لئی کہندا اے۔
اوہناں نے حکومت اُتے تنقید کردیاں آکھیا کہ پٹرولیم لیوی ختم کرن اُتے حکومت نوں مسئلہ نہیں ہونا چاہیدا، سیاسی جماعتاں دے اپنے خاندان آئی پی پیز وچ موجود نیں، پاکستان دے نوجواناں توں 1700 ارب روپے وصول کیتے گئے جدکہ پاکستان وچ ڈھائی کروڑ موٹر سائیکلاں نیں۔
حافظ نعیم دا کہنا سی کہ جاگیرداراں نے 10 ارب روپے ٹیکس وی ادا نہیں کیتا، پچھلے سال عوام توں کیپیسٹی پیمنٹ دے ناں اُتے 1800 ارب روپے وصول کیتے گئے، آئی پی پیز مافیا توں نجات حاصل کیتی جاوے، پٹرول دی قیمت آپے ہی ٹھیک ہو جاوے گی، مطالبہ اے پٹرول دی قیمت فوراً 225 روپے فی لیٹر ہونی چاہیدی اے، پٹرول دی مد وچ ڈاکہ ماریا جا رہا اے۔
