محسن نقوی دا جلوساں، مجالس دے داخلی تے خارجی رستیاں تے سخت چیکنگ دا حکم

اسلام آباد: وفاقی وزیر داخلہ محسن نقوی نے جلوساں تے مجالس دے داخلی تے خارجی رستیاں تے سخت چیکنگ دا حکم دے دتا اے۔
وزیر داخلہ محسن نقوی دی زیرِ صدارت محرم الحرام دے دوران سکیورٹی تے ہور انتظاماں بارے جائزہ اجلاس ہویا۔
اجلاس وچ دسیا گیا کہ سیف سٹی وچ مرکزی کنٹرول روم قائم کر دتا گیا اے، مجالس تے جلوساں دی حفاظت لئی 4 درجاتی حصار قائم کرن دا فیصلہ کیتا گیا اے، محفوظ محرم خصوصی ایپ دے راہیں شہری مشتبہ بندے، مشکوک سرگرمی یا نامکمل حفاظتی انتظاماں دی اطلاع دے سکن گے، لائیو لوکیشن تے امیج شیئرنگ دی سہولت وی لبھے گی۔
وزیر داخلہ نے جلوساں تے مجالس دے داخلی تے خارجی رستیاں تے سخت چیکنگ دا حکم وی دتا اے تے جامع ٹریفک پلان تے عملدرآمد دی ہدایت کیتی۔
محسن نقوی نے ‎ہدایت کیتی کہ متعلقہ افسران فیلڈ وچ موجود رہن، اہلکاراں دے کھان پین دے معیاری انتظاماں نوں ویلے سر یقینی بنایا جائے، ‎امن و امان برقرار رکھن لئی علمائے کرام نال نیڑے دا رابطہ رکھیا جائے۔
وزیر داخلہ دا کہنا سی کہ ضابطہ اخلاق دی پابندی نوں یقینی بنایا جائے، اشتعال انگیز مواد دے خلاف زیرو ٹالرنس پالیسی اپنائی جائے۔