آزاد کشمیر انتخابات دا نواں انتخابی شیڈول جاری، کاغذاتِ نامزدگی جمع کروان دی آخری تریخ 23 جون مقرر
آزاد جموں و کشمیر الیکشن کمیشن نے نواں انتخابی شیڈول جاری کر دتا، کاغذاتِ نامزدگی جمع کروان دی آخری تریخ 23 جون مقرر کیتی گئی۔
اعلامیے دے مطابق کاغذاتِ نامزدگی دی جانچ پڑتال 24 جون نوں سویرے 8 بجے توں ہوئے گی، درست امیدواراں دی لسٹ 24 جون نوں ہی جاری کیتی جائے گی۔
نوٹیفکیشن دے مطابق ریٹرننگ آفیسر دے فیصلیاں دے خلاف اپیلاں 25 توں 28 جون تک دائر کیتیاں جا سکن گیاں، الیکشن کمیشن اپیلاں دی سماعت 29 تے 30 جون نوں کرے گا، اپیلاں اُتے فیصلے یکم تے 2 جولائی نوں سنائے جان گے۔
آزاد جموں و کشمیر الیکشن کمیشن ولوں جاری نوٹیفکیشن دے مطابق کاغذاتِ نامزدگی واپس لین دی آخری تریخ 3 جولائی دوپہر 2 بجے مقرر کیتی گئی، امیدواراں دی لسٹ 4 جولائی نوں شائع کیتی جائے گی، انتخابی نشان 5 جولائی نوں الاٹ کیتے جان گے، حتمی امیدواراں دی لسٹ انتخابی نشاناں سمیت 5 جولائی نوں جاری ہوئے گی۔
نوٹیفکیشن وچ دَسیا گیا کہ آزاد کشمیر قانون ساز اسمبلی دے عام چُناؤ (انتخابات) لئی پولنگ 27 جولائی نوں ہوئے گی، پونچھ (راولاکوٹ) دے امیدوار کاغذاتِ نامزدگی متعلقہ آر او نوں جمع کروان گے، کاغذاتِ نامزدگی دی جانچ پڑتال بھی ضلع پونچھ (راولاکوٹ) وچ ہی ہوئے گی۔
الیکشن کمیشن دے مطابق امیدواراں دی درخواست اُتے نامزدگی فارم جمع کروان دی تریخ وچ وادھا کیتا گیا، عوامی سہولت تے امیدواراں دیاں تجاویز نوں دھیان وچ رکھدے ہوئے شیڈول وچ ترمیم کیتی، امیدوار مقررہ تریخ تے ویلے دے اندر کاغذاتِ نامزدگی جمع کروانا یقینی بناؤن۔
