انسٹیٹیوٹ آف سرجیکل آرتھو پیڈک اینڈ میڈیکل رہیب تے چلڈرن ہسپتال فور دی منظوری
لاہور:
وزیراعلیٰ پنجاب مریم نواز شریف نے انسٹیٹیوٹ آف سرجیکل آرتھو پیڈک اینڈ میڈیکل رہیب تے چلڈرن ہسپتال فور دی منظوری دے دتی اے۔ وزیراعلیٰ پنجاب مریم نواز شریف دی صدارت ہیٹھ ہوئے اک خاص اجلاس وچ پبلک پرائیویٹ پارٹنرشپ بارے معاملیاں دا جائزہ لیا گیا۔
نواز شریف میڈیکل ڈسٹرکٹ وچ انسٹیٹیوٹ آف سرجیکل آرتھو پیڈک اینڈ میڈیکل رہیب تے چلڈرن ہسپتال فور، پلاسٹک ری کنسٹریکٹو سرجری اینڈ برن سینٹر تے انسٹیٹیوٹ آف جینیٹک اینڈ بلڈ ڈیزیز وی میڈیکل سٹی وچ بنے گا۔ ایس توں علاوہ سنٹر آف ایکسی لینس نرسنگ اینڈ مڈ وائفری، انسٹیٹیوٹ آف آپتھلمالوجی تے انفیکشن ڈیزیز ہسپتال وی بنائے جان گے، جدکہ نواز شریف میڈیکل سٹی وچ 1519 بستریاں (بیڈز) تے مشتمل ست وڈے ہسپتال مرحلہ وار بنائے جان گے۔
وزیراعلیٰ مریم نواز شریف نے 19 سالاں بعد پنجاب پبلک پرائیویٹ پارٹنرشپ اتھارٹی دے پوری طرح فعال ہون تے خوشی دا اظہار کیتا تے چیف سیکرٹری زاہد اختر زمان، سیکرٹری فنانس مجاہد شیر دل تے پنجاب پبلک پرائیویٹ پارٹنرشپ اتھارٹی دے سی ای او ڈاکٹر ذیشان حنیف نوں وی سراہیا۔
اجلاس وچ پورے پنجاب لئی 110 مجوزہ ترقیاتی منصوبیاں وچ پبلک پرائیویٹ پارٹنرشپ دے امکاناں دا پکا جائزہ لیا گیا۔ پنجاب وچ پہلی واری پبلک پرائیویٹ پارٹنرشپ دے تحت سٹوڈنٹس ہاسٹل قائم کرن دی تجویز تے وی غور کیتا گیا، ایس توں وکھ پبلک پرائیویٹ پارٹنرشپ دے تحت سڑکاں (روڈز)، ٹرکنگ ٹرمنل، بس سٹینڈ، ماڈل بازار تے فوڈ سٹریٹس پراجیکٹ دا وی جائزہ لیا گیا۔
بریفنگ وچ دسیا گیا کہ پبلک پرائیویٹ پارٹنرشپ دے تحت چار پراجیکٹ کامیابی نال چل رہے نیں، 27 پراجیکٹس دی فزیبلٹی تیار اے جدکہ دوجے پراجیکٹاں تے کم تیزی نال جاری اے، پبلک پرائیویٹ پارٹنرشپ پلان وچ 4 وڈے سی ایم اینی شیٹیو وی شامل نیں۔
وزیر اعلیٰ پنجاب نوں بریفنگ وچ دسیا گیا کہ نواز شریف میڈیکل ڈسٹرکٹ وچ ایف ایم ڈی پروڈکشن پلانٹ، ٹائم ٹریول پارک لاہور، شریمپ فارمنگ تے مائنز ٹو میٹل چنیوٹ پراجیکٹ شامل نیں۔
مریم نواز نے آکھیا کہ پنجاب وچ ترقی دا سفر ہر حال وچ جاری رہے گا، پبلک پرائیویٹ پارٹنرشپ دا مقصد ڈویلپمنٹ دے کم وچ نجی شعبے (پرائیویٹ سیکٹر) نوں وی شامل کرنا اے، پبلک پرائیویٹ پارٹنرشپ دے ویژن دے تحت ترقیاتی منصوبیاں نوں اوہناں دے انجام تیکر پہنچاواں گے۔
