بحرالکاہل دا درجہ حرارت ودھن نال ایل نینو فعال، پاکستان وچ بارشاں متاثر ہون دا ڈر

کراچی: بحرالکاہل دا درجہ حرارت ودھن نال ایل نینو فعال ہو گیا اے۔

سپارکو نے ایل نینو الرٹ جاری کردیاں آکھیا اے پئی بحرالکاہل دے وسطی تے مشرقی حصیاں وچ درجہ حرارت معمول توں ودھ اے تے ایہ موسمی رجحان پاکستان دے موسم نوں متاثر کر سکدا اے۔

ایہ بھی پڑھو:

• ایل نینو سرگرم ہون نال پاکستان وچ ایس سال بارشاں گھٹ ہونگیاں، ایل نینو کیہ اے؟
• ماہرین دا ایل نینو پاروں عالمی درجہ حرارت ریکارڈ پدھر اتے پہنچن دا انتباہ (چتاونی)

سپارکو دے مطابق پاکستان وچ چالو سال دے مونسون تے سیاکال (سردیاں) وچ موسمی پیٹرن متاثر ہون دا امکان اے، جنوب مشرقی ایشیا، آسٹریلیا، بھارت تے افریقا دے کچھ حصیاں وچ قحط (خشک سالی) دا ڈر اے جڈوں کہ جنوبی امریکا تے مشرقی افریقا دے کچھ علاقیاں وچ ودھ بارشاں دی امید اے۔

سپارکو دے مطابق پاکستان وچ ماڑیاں (کمزور) مونسون بارشاں ہو سکدیاں نیں تے پاکستان وچ سردیاں وچ درجہ حرارت تھوڑا ودھ رہ سکدا اے۔

ایس توں وکھ، بسنت (بہار) تے ہاڑ (گرمیاں) وچ لُو (ہیٹ ویوز) دے امکانات وچ وادھا ہو سکدا اے جڈوں کہ ایل نینو دے اثرات زرعی شعبے تے پانی دے وسیلیاں نوں متاثر کر سکدے نیںے۔

ایل نینو کیہ اے؟ ایل نینو دنیا بھر وچ درجہ حرارت وچ وادھے دا کارن بنن والا اک موسمی عمل اے، ایل نینو پاروں دنیا دے کچھ حصیاں وچ قحط تے کچھ تھانواں اتے بھاری بارشاں ہو سکدیاں نیں۔

ایل نینو پیسفک اوشن (بحرالکاہل) دے سطح سمندر دے معمول توں ودھ درجہ حرارت پاروں سرگرم ہوندا اے، ایل نینو دے دوران پاکستان سمیت خطے وچ بارشاں گھٹ ہو جاندیاں نیں جڈوں کہ پاکستان اک زرعی ملک اے جتھے بارشاں گھٹ ہون نال کھیتی باڑی (زراعت) متاثر ہو سکدی اے۔