’میں اتے اٹلی کسے دے سامنے ہتھ نہیں پھیلاندے‘، اطالوی وزیر اعظم جارجیا میلونی نے ٹرمپ نوں آڑے ہتھیں لے لیا

اطالوی وزیر اعظم جارجیا میلونی نے امریکی صدر ڈونلڈ ٹرمپ ولوں دتے گئے اک بیان توں بعد اوہناں نوں آڑے ہتھیں لے لیا اے۔

امریکی صدر ٹرمپ نے اک اطالوی ٹی وی چینل نوں انٹرویو وچ آکھیا کہ جارجیا میلونی نے جی 7 (G7) اجلاس وچ اوہناں دے نال تصویر بنوان لئی بہت منّتاں سماجتاں کیتیاں سن۔

فرانس وچ ہون والے اجلاس دی ویڈیو وچ میلونی اتے ٹرمپ نوں اک صوفے اُتے نال بہہ کے گل بات کردے ویکھیا گیا سی، پر ٹرمپ نے دعویٰ کیتا کہ اوہناں نے صرف ’مہربانی‘ دے طور اُتے میلونی نال گل کیتی۔

اطالوی ٹی وی چینل دے مطابق ٹرمپ نے آکھیا، ’اوہ شاید خوش نیں کہ میں اوہناں نال گل کیتی، مینوں اوہناں نال گل کرن دی لوڑ (ضرورت) نہیں سی۔‘

اوہناں نے ہور آکھیا کہ میلونی نے ’میرے نال تصویر لین دی درخواست کیتی، میں تصویر نہ لیندا، پر مینوں اوہناں اُتے ترس آ گیا‘۔

جارجیا میلونی نے ٹرمپ دے بیان دا سخت لفظاں وچ جواب دیندے ہوئے آکھیا کہ ’ڈونلڈ ٹرمپ دے بیان بالکل من گھڑت نیں، میں واقعی حیران واں۔ مینوں سمجھ نہیں آؤندی کہ امریکا دا صدر اپنے اتحادیاں (ساتھی ملکاں) دے نال ایسا رویہ کیوں رکھدا اے، اتے اے پہلی واری نہیں ہویا۔‘

اوہناں نے ہور آکھیا کہ ’اے افسوسناک اے کہ اوہ مغرب اتے امریکا دے دشمناں نال ایسا رویہ نہیں رکھدے، بلکہ اوہناں دے لیڈراں نال زیادہ نرمی ورتدے نیں‘۔

میلونی نے زور دے کے آکھیا کہ ’اک گل اوہناں نوں یاد رکھنی چاہیدی اے کہ میں اتے اٹلی کدی کسے دے سامنے ہتھ نہیں پھیلاندے‘۔

غیر ملکی خبر رساں ایجنسی دے مطابق اس معاملے اُتے اطالوی حکومت دی ناراضی دا اندازہ اس گل توں وی لگایا جا سکدا اے کہ وزیر خارجہ انتونیو تاجانی نے اگلے ہفتے امریکا دا طے شدہ دورہ منسوخ (کینسل) کرن دا اعلان کر دتا اے۔

اطالوی وزیر خارجہ نے اپنے بیان وچ آکھیا کہ ’صدر ٹرمپ دے وزیراعظم جارجیا میلونی دے بارے وچ توہین آمیز اتے سنگین لفظ پورے اٹلی دی توہین نیں‘۔