امریکا ایران مذاکرات: صدر ٹرمپ دے ایلچی تے ایرانی وزیر خارجہ سوئٹزرلینڈ روانہ۔
واشنگٹن: امریکی ایلچی سٹیو وٹکوف تے ایرانی وزیرِ خارجہ عباس عراقچی اک اہم سفارتی مشن تے سوئٹزرلینڈ روانہ ہو رہے نیں، جِتھے لبنان چ ہون والی حالیہ جنگ بندی توں بعد واشنگٹن تے تہران دے وچکار عبوری امن معاہدے نوں اک پکے علاقائی امن ڈیل چ بدلن دیاں کوششاں تیز ہو گئیاں نیں۔
امریکی ویب سائٹ ایکسیوس دے مطابق سٹیو وٹکوف سوئٹزرلینڈ چ صدر ڈونلڈ ٹرمپ دے جوائی (داماد) جیرڈ کشنر دے نال اس اعلیٰ سطحی بیٹھک دا حصہ بنن گے، جدکہ ایرانی وزیرِ خارجہ عباس عراقچی دے وی چھنچھر (سنیچر) نوں اوتھے اپڑن دی امید اے۔
ایہ پیش رفت ایسے ویلے سامنے آئی اے جدوں صرف اک دن پہلاں لبنان چ اسرائیل تے حزب اللہ دے وچکار شدید لڑائی پاروں امریکی نائب صدر جے ڈی وینس نے سوئٹزرلینڈ دا اپنا دورہ منسوخ کر دِتا سی، جیہدے نال آبنائے ہرمز نوں دوبارہ کھولن تے عالمی پدھر تے تیل دی سپلائی نوں بحال کرن دیاں نازک کوششاں تے سوالیہ نشان لگ گیا سی۔
دوہاں ملکاں دے وچکار طے پاون والے 14 نکاتی عبوری معاہدے نے صورتحال بدل دِتی اے، اس معاہدے دے تحت فریقین نوں ایران دے جوہری پروگرام تے ہور پچیدہ علاقائی رولیاں (تنازعات) نوں حل کرن لئی 60 دناں دا ویلا ملیا اے۔
اک سینیئر امریکی اہلکار نے دَسیا کہ اسرائیل تے حزب اللہ چ وی جنگ بندی ہو گئی اے، امریکا تے قطر دے مذاکرات کاراں نے ایران دے تعاون نال ایہ معاہدہ ممکن بنایا، حزب اللہ تے اسرائیلی حکام نے وی اس جنگ بندی دی تصدیق کیتی اے۔
اک اسرائیلی اہلکار دا کہنا سی کہ جے حزب اللہ ساڈے تے حملہ نہیں کردی، تے ساڈے لئی ایہ جنگ دا ویلا نہیں، پر اسرائیلی فوج سیکیورٹی وجہاں پاروں جنوبی لبنان چ موجود رہے گی۔
لبنانی وزارتِ صحت دے مطابق جنگ بندی توں کچھ گھنٹے پہلاں اسرائیلی فضائی حملیاں چ 47 لبنانی شہری مارے گئے، جدکہ اسرائیل نے وی اپنے چار فوجیاں دی ہلاکت دا اعتراف کیتا اے۔
