لاہور دے میو ہسپتال توں لکھاں روپے دیاں قیمتی دوائیاں چوری۔
لاہور: صوبائی دارالحکومت دے منے پرمنے ہسپتال توں وزیر اعلیٰ پنجاب سٹروک پروگرام دیاں دوائیاں چوری ہون دا انکشاف ہویا اے۔
صوبائی دارالحکومت چ میو ہسپتال چوں فالج دے علاج والے 15 لکھ روپے دی مالیت دے انجکشن چوری ہو گئے، ٹی پی اے (TPA) انجکشن ایمرجنسی وارڈ چوں غائب کیتے گئے۔
دوجی پاسے ہسپتال انتظامیہ لکھاں روپے دے چوری ہون والے انجکشنز دا اجے تکر کوئی سراغ نہیں لا سکی۔
یاد رہے کہ وزیر اعلیٰ سٹروک پروگرام چ فالج دے مریضاں دی جان بچان لئی مفت ٹیکے لائے جاندے نیں، ایہ ڈوز لگن نال مریض دی جان تے اوہنوں جسمانی معذوری توں بچایا جاندا اے۔
دوجی پاسے ایم ایس میو ہسپتال دا کہنا سی کہ انجکشن دی چوری دے حوالے نال انکوائری کر رہے آں، انجکشنز دی گمشدگی سچ ثابت ہو گئی اے، جیہدے توں بعد 5 ڈیٹا انٹری آپریٹرز تے ڈسپنسرز دے خلاف کارروائی شروع کر دِتی گئی اے۔
اوہناں دا مزید کہنا سی کہ تمام متعلقہ ملازمین دے خلاف پیڈا ایکٹ (PEEDA Act) دے تحت محکمانہ انکوائری کیتی جا رہی اے، مڈھلی (ابتدائی) تحقیق چ انجکشنز دا غائب ہونا ثابت ہو گیا اے۔
