اسلام آباد: وفاقی وزیرِ خزانہ محمد اورنگزیب دا کہنا اے کہ پینشنرز لئی ہن ‘چہرہ شناسی’ (Face Recognition) راہیں تصدیق دا نواں ڈیجیٹل نظام ساہمنّے لیاندا گیا اے، جیدے نال اوہناں نوں بینکاں دے چکر نہیں کٹنے پین گے۔

تفصیلات دے مطابق قومی اسمبلی دے اجلاس وچ وفاقی وزیرِ خزانہ محمد اورنگزیب نے گل بات کردیاں ہویاں کیہا کہ حکومت نے سرکاری ملازمین دیاں تنخواہواں تے پینشن وچ چنگا بھلا وادھا کیتا اے تے پہلے توں ٹیکس دین والیاں تے ٹیکس دا بوجھ گھٹ کیتا گیا اے۔

بجٹ بارے تفصیلات دَسدیاں ہویاں وزیرِ خزانہ نے بزرگ پینشنرز لئی اک انقلابی قدم دا اعلان کیتا تے کیہا کہ پینشنرز لئی ہن ‘چہرہ شناسی’ دے ذریعے تصدیق دا نواں ڈیجیٹل نظام شروع کیتا گیا اے، جیدے توں بعد ہن بزرگ پینشنرز بینکاں دے چکر کٹن دی بجائے گھر بیٹھے ہی اپنی تصدیق پوری کر سکن گے۔

اوہناں دا کہنا سی کہ ٹیکس نیٹ نوں ودھان لئی وڈے قدم چکے گئے نیں تے ڈیجیٹلائزیشن تے آرٹیفیشل انٹیلیجنس (AI) دے استعمال نال صوابدیدی اختیارات نوں مکانا (ختم کرنا) حکومت دا اصل ہدف اے۔

معاشی اشاریاں تے گل کردیاں ہویاں محمد اورنگزیب نے دَسیا کہ پچھلے اک سال دے دوران ملکی معاشی اشاریاں وچ واہوا بہتری آئی اے تے ہن کرنٹ اکاؤنٹ سرپلس وچ اے۔

اوہناں نے دَسیا کہ پردیس وچ رہن والے پاکستانیاں نے 4.25 ارب ڈالر دا زرمبادلہ پاکستان بھیجیا اے، جڈوں کہ پاکستانی فری لانسرز نے وی اک سال وچ 1.6 ارب ڈالر دی ریکارڈ کمائی دیس بھیجی اے۔

وزیرِ خزانہ دا کہنا سی کہ حکومت دا اصل نشانہ ‘ایکسپورٹ لیڈ گروتھ’ اے تے دیس نے دو سالاں دے ویلے وچ 14 ارب ڈالر دا ٹیکس (محصولات) اکٹھا کیتا اے۔ وزیراعظم نے پچھلے دن پیٹرولیم چیزاں دیاں قیمتاں وچ چنگی بھلی کمی دا اعلان کیتا اے تے عوام نے دیس دے معاشی صبر دے سفر تے مضبوطی وچ حکومت دا پورا ساتھ دتا اے۔

محمد اورنگزیب نے کھیتی باڑی (زراعت) نوں ملکی معیشت دی ریڑھ دی ہڈی آکھدیاں ہویاں کساناں لئی اہم مراعات دا اعلان کیتا تے کیہا کہ حکومت چین دے نال زرعی شعبے وچ سانجھے داری نوں ہور ودھا رہی اے تے ایس لئی ہن تیکر 885 پاکستانی پَڑھاکو (طلبہ) چین توں زراعت دے شعبے وچ نویں تربیت حاصل کر چکے نیں‌۔

وزیرِ خزانہ نے دَسیا کہ دیس وچ زراعت دے شعبے نوں نویں رنگ وچ ڈھالن لئی نویں مشینری منگوان (درآمد کرن) تے ڈیوٹی نوں پورا ختم کر دتا گیا اے۔